Европын Сэргээн Босголт, Хөгжлийн банк Монгол Улсын эдийн засгийн өсөлтийн төсөөллийг хэвээр үлдээлээ. Ингэснээр 2023 онд долоон хувь, 2024 онд 7.5 хувиар өснө гэж тооцоолж байна.
Эрчим хүчний үнийн өсөлт болон инфляц эдийн засгийн өсөлтөд сорилт болж буй хэвээр байгааг бүсийн эдийн засгийн чуулганы үеэр мэдэгдлээ.
2023 онд тус байгууллагын үйл ажиллагаа явуулдаг бүс нутгийн дотоодын нийт бүтээгдэхүүн 2.1 хувиар өсөх төлөвтэй байгаа нь өнгөрсөн оны есдүгээр сард танилцуулсан төсөөллөөс буурсан үзүүлэлт болж байна. Харин 2024 онд өсөлт эрчимжиж, 3.3 хувь болно гэж тооцоолжээ.
Эндээс Төв Азийн орнуудын дотоодын нийт бүтээгдэхүүн 4.9 хувиар өсөх төлөвтэй байгаа нь бусад бүсийн орнуудтай харьцуулахад хамгийн өндөр үзүүлэлт болж байна.
Газрын тос, байгалийн хийн үнийн өсөлт эрчимжиж, ажиллах хүч, хөрөнгө, болон мөнгөн гуйвуулгын урсгал нэмэгджээ.
2024 онд дэд бүтцийн хөрөнгө оруулалт, түүхий эдийн үнийн өсөлт, ОХУ-ын бизнесүүд тэлэх зэрэгтэй холбоотойгоор эдийн засгийн өсөлт 5.4 хувьд хүрнэ гэж тооцоолж байна.
Түүнчлэн Норвеги, Алжираас Европ руу шингэрүүлсэн байгалийн хий нийлүүлж эхэлснээр үнийн дарамтыг бууруулахад дэмжлэг болж байгаа аж. Ерөнхийдөө байгалийн хийн үнэ болоод түүхий эдийн үнэ дайнаас өмнөх үеийн түвшиндээ эргэн буусныг тайланд мэдээлжээ.
