Төгрөгийн хадгаламж I сард өмнөх сараас 1.6 хувиар өсжээ
Мөнгөний нийлүүлэлт нэгдүгээр сарын эцэст 29.7 их наяд төгрөг болж, өмнөх оны мөн үеэс 10.9 хувиар өссөнийг Үндэсний Статистикийн хороо мэдээллээ. Энэхүү өсөлтөд валютын харилцах 2.2 дахин, валютын хадгаламж 35.7 хувиар өссөн нь голлон нөлөөлжээ. Сүүлийн нэг жилийн хугацаанд валютын хадгаламжийн үлдэгдэл тасралтгүй өссөөр 5.5 их наяд төгрөг хүрсэн байна.
Мөн сарын дүнгээр төгрөгийн хадгаламж 1.6 хувиар өсөж, нийт үлдэгдэл 12.8 их наяд төгрөг болжээ.
Цар тахлаас урьдчилан сэргийлэх, тэмцэх, нийгэм эдийн засагт үзүүлэх сөрөг нөлөөллийг бууруулах тухай хууль 2022 онд дуусгавар болсноор арилжааны банкнууд нэгдүгээр сараас хугацаагүй хадгаламждаа хүү тооцож эхэлсэн юм.
Хугацаагүй хадгаламжийн хүү нэгдүгээр сарын байдлаар 2.43-8 хувийн хооронд харилцан адилгүй байна.
2022 оны есдүгээр сард бодлогын хүүг нэмэгдүүлж, 12 хувьд хүргэсний дараа хадгаламжийн хүүгийн түвшин 1-2 нэгж хувиар нэмэгдэж байв. Харин 12 дугаар сард Монголбанкны Мөнгөний бодлогын хороо бодлогын хүүг 13 хувьд хүргэсэн юм.
Хэдий тийм боловч үүний дараа арилжааны банкнуудын хадгаламжийн хүүгийн түвшин огцом өсөөгүй, тогтвортой байсан гэж “TDB Securities” ҮЦК-ийн шинжээчид мэдээлж байв.
Иргэдийн хамгийн түгээмэл сонгодог энгийн 12 сарын хугацаатай хадгаламжийн хүү банкны системийн хэмжээнд 11.2-13.5 хувьтай байсан байна.
