Дундговь : “Үндэсний бичиг үсгийн баяр”-ыг угтан Дундговь аймгийн Хэлний бодлогын салбар зөвлөлөөс багш, төрийн албан хаагчид, сургуулийн сурагчдын чадавхыг нэмэгдүүлэх, ерөнхий түвшнийг тодорхойлох, бичиг үсгээ сурталчлах олон үйл ажиллагааг зохион байгуулж байна.
Монгол Улсын Ерөнхийлөгчийн зарлигаар жил бүрийн тавдугаар сарын эхний ням гарагт тэмдэглэн өнгөрүүлдэг “Үндэсний бичиг үсгийн баяр”, "Үндэсний бичиг III" хөтөлбөрийг хэрэгжүүлэх чиглэлээр аймгийн Хэлний бодлогын салбар зөвлөлөөс удирдамж гарган төрийн албан хаагчдын дунд “Төрийн албан хаагчийн мэдлэг чадварын сорил-2022”, “Цахим бичвэр”-ийн уралдаан, сургуулийн сурагчдын дунд монгол бичгийн “Тэргүүний уншигч”-ийг шалгаруулах, “Бийрэн бичиг” уралдааныг тус тус зохион байгуулаад байна.
Мөн Мэдээлэл харилцааны технологийг сургалтын үйл ажиллагаанд оновчтой ашиглах, багш нарын хөгжлийг дэмжих, цахим контент боловсруулах арга аргачлалд суралцах, шилдэг аргазүй, технологийн сан бүрдүүлэх тэргүүн туршлагыг түгээн дэлгэрүүлэх зорилгоор “Ээлжит хичээлийн цахим контент-2022” уралдааныг зохион байгуулж, монгол хэл бичгийн 19 багш оролцжээ. Тус уралдаанд Хүмүүнлэг сургуулийн багш Ц.Цэцэгмаа тэргүүлж, Сайхан-Овоо сумын О.Дэлгэрцэцэг, "Говийн ирээдүй" цогцолбор сургуулийн багш Ө. Болормаа нар удаалжээ.
"Цахим бичвэр"-ийн уралдаанд Эрдэнэдалай сумын Сум дундын эмнэлгийн их эмч Б.Ган-Эрдэнэ түрүүлж, тус аймгийн Политехник коллежийн номын санч О.Уртнасан, МХГ-ын биологич Г.Мөнхсарнай, Уламжлалт анагаах ухааны төвийн эмч Х.Ширчинсүрэн, Цэгц билэг сургуулийн бичиг хэргийн ажилтан Б.Оюунтуяа нар амжилттай оролцож, удаах байруудад шалгарсан байна.
Харин "Бийрэн бичиг-2022” уралдааныг дунд, ахлах ангийн сурагчдын дунд зохион байгуулж, 2 ангилалд Сайнцагаан сумын 4 сургуулийн 15 сурагч оролцсоноос Цэгц билэг сургуулийн 6 сурагч амжилттай оролцож, бусдыгаа хошуучилжээ.
Түүнчлэн тус аймаг дахь Политехник коллежийн хамт олон иргэдийн дунд “Тээгч, түгээгч” өдөрлөг зохион байгуулж, иргэдэд коллежийн танилцуулга, мэдээлэл өгч, бийрэн бичлэгийн анхан шатны сургалт хийсэн бөгөөд тэдний дунд “минутын уншлага” зохион байгуулжээ.
Өдөрлөгт 9 багийн 18 иргэн оролцон үндэсний бичиг, өв соёлоо “Тээгч түгээгч”-ийг шалгарууллаа. Үндэсний бичиг, өв соёлоо “Тээгч түгээгч” иргэн Я.Мөнхгэрэл, Д.Уртнасан, О.Нарангэрэл нар шалгарчээ.