Ховд :Туркийн хамтын ажиллагаа, зохицуулах агентлаг ТИКА-ийн дэд ерөнхийлөгч Үмит Нажи Ёорулмаз тэргүүтэй ажлын баг энэ сарын 24-нд Ховд аймагт зочиллоо.
Улмаар аймгийн удирдлагуудтай уулзалт хийж, тус аймагт хэрэгжүүлж буй төсөл хөтөлбөрийн явц, үр дүнтэй газар дээр нь танилцав.
ТИКА-ийн Улаанбаатар дахь Хөтөлбөр зохицуулах газар нь 2004 онд албан ёсоор үйл ажиллагаагаа эхлүүлсэн бөгөөд түүнээс хойш Монгол Улсын бүхий л салбарт нийт 770 төсөл хөтөлбөр хэрэгжүүлсэн байна.
Онцлоход, ТИКА-ийн буцалтгүй тусламж, дэмжлэгтэйгээр Ховд аймаг дахь “Хөгжил” политехник коллежийн Хоол үйлдвэрлэлийн дадлагын газрыг тохижуулах, тоног төхөөрөмж шинэчлэх төслийг амжилттай хэрэгжүүлж, энэ сарын 24-нд нээлт хийлээ.
Тус коллежийн Хоол үйлдвэрлэлийн дадлагын газарт шаардлагатай 34 нэр төрлийн тоног төхөөрөмжийг нийлүүлснээр сургалтын орчин сайжирч, 2021-2022 оны хичээлийн жилээс эхлэн сургуулийн цайны газар болон дадлагын газарт багш, суралцагчид орчин үеийн тоног төхөөрөмжүүдийг ашиглаж, ур чадвараа дээшлүүлэх боломж бүрдсэн байна.
Ийнхүү үйлдвэрлэлийн дадлагын байранд таатай орчинд чанартай суралцах боломж олгосон Туркийн хамтын ажиллагааны зохицуулах агентлаг ТИКА-д баярласан талархсанаа илэрхийллээ.