Харааны болон сонсголын бэрхшээлтэй хүүхдүүдтэй ажиллах АРТ ТЕРАПИ хөтөлбөр боловсруулж байна.
Арт терапи нь хүн өөрийн дотоод сэтгэлдээ байгаа айдас, түгшүүр, санаа зоволт, уур бухимдал, стресс зэрэг тулгамдсан асуудлуудаа урлагийн хэрэгслүүдийн тусламжтайгаар шийдэх арга замаа өөрөө бүтээлчээр хайж олох мэргэжлийн үйл ажиллагаа юм.
Арт терапи нь 1945 оноос Англи, Австри, Америк, Австрали улсад хөгжиж эхэлсэн. Тиймээс арт терапи мэргэжлийн түвшинд хөгжсөн эдгээр улс орнууын туршлагаас суралцаж өөрийн орны онцлогт тохируулан хөгжүүлэх хэрэгцээ, шаардлага байна.
1930аад оноос эхлэн олон орны эрдэмтэд урлагаар дамжуулан эмчлэх гэдэг үзэл санааг хүлээн зөвшөөрч арт терапийг өргөнөөр хэрэглэхийг дэмжиж, хөгжүүлж эхэлжээ .
Түүнээс хойш арт терапи талаар ойлголтууд улам түгээн дэлгэрч практикт өргөнөөр ашиглагдаж эхэлсэн. Ийнхүү урлагийн сэтгэл засал нь бие даан хөгжих суурь тавигдаж энэ чиглэлийн мэргэжилтнүүд бэлтгэгдэж эхэлжээ. Цаашлаад энэ мэргэжлийг хөгжүүлэхэд Маргарет Наумберг, Эдит Крамер, Ханна Квицкова, Элинор Улман нар үнэтэй хувь нэмэр оруулжээ.
Манай улсад НҮБ-ын Хүн амын сангийн санхүүжилтээр Боловсролын ерөнхий газар, Банхар Арт терапи төслийн хамт олон хамтран ерөнхий боловсролын 29 болон 116 дугаар сургуульд суралцаж буй хараа, сонсголын бэрхшээлтэй хүүхдүүдэд зориулсан АРТ ТЕРАПИ арга зүйг боловсруулж, тэдэнтэй ажиллах багш нар, эцэг эх, асран хамгаалагчдад стрессээ бууруулах, сэтгэл, хөдлөл, мэдрэмжээ удирдах, орчин үеийн хүүхдүүдтэй ажиллах арга, хандлага өөрчлөх сургалтуудыг зохион байгуулна.
Г.Бүжинлхам
