Эрүүл мэндийн яамнаас халдварт сармагчны цэцэг өвчний талаар мэдээлэл хийлээ.
ЭМЯ-ны зөвлөх О.БАТБАЯР: -Дэлхийн бүх тивийн 30 оронд халдварт сармагчны цэцэг өвчин бүртгэгдсэн. Манай улсад халдвар зөөвөрлөгдөн орж ирэх эрсдэл байгаа. Тийм учраас эрсдэлийн үнэлгээнд суурилж, төлөвлөгөө боловсруулж буй. Хил дээрх хяналтын байгууллагууд энэ чиглэлээр ажиллаж байна. Хамгийн гол нь энэ бүс нутаг руу буюу Африк, АНУ, Австрали, Канад, Их Британи, Норвеги улсаас зөөвөрлөгдөх магадлалтай. Халдварын шархны цэврүүнд вирус байгаа учраас гар, бие нь хүрсэн хүмүүс өвчлөх эрсдэлтэй. Шинж тэмдгийн хувьд эхний 2-3 хоногт халуурч, дараагаар нь хүзүү, суганы булчирхай цочирч байгаа. Мөн хүний нүүр ам, гар хөл дээр цэврүүт тууралт гардаг. Бид ДЭМБ-тай өдөр тутам мэдээлэл солилцож байгаа. Тус байгууллагаас гаргасан удирдамжийн дагуу дотоодын удирдамжийг боловсруулж байна.