УИХ-ын нэгдсэн чуулганы өнөөдрийн хуралдаан үргэлжилж байна. Энэ үеэр Төрийн албаны тухай хуульд нэмэлт, өөрчлөлт оруулах тухай хуулийн төслийг хэлэлцэх эсэх талаар үргэлжлүүлэн хэлэлцлээ.
Үүнтэй холбогдуулж УИХ-ын гишүүн Б.Баярсайхан үг хэллээ. Тэрбээр, "2023 оны төсвийн төсөөлөл хэлэлцэж байна. Гэтэл уг төсвийн төсөөлөлд хүүхэдтэй холбоотой зардлууд хангалттай тавигдаагүй байна. Тиймээс "Хүүхдийн эрхийг хамгаалах өдөр" ойртож байгаатай холбогдуулан үүнийг хэлэх хүсэлт тавьсан.
Өнөөдөр УИХ-ын гишүүний зүгээс, ард түмний өмнө өгсөн үүрэг хариуцлагынхаа хүрээнд төрийн ордонд "Хүүхдэд ээлтэй монгол, хүүхдийн өмнө үүрэг хүлээгчдийн үндэсний чуулган"-ыг зохион байгуулж байна. Энэ чуулганд төрийн болон ТББ, ОУБ-ын төлөөлөл, иргэд, эцэг эхчүүд оролцож байна.
Монгол Улсын хамгийн үнэт баялаг бол монгол хүн, тэр дундаа үнэт эрдэнэ болсон үр хүүхдүүд юм. Гэтэл ирээдүй хойч болсон хүүхдүүд маань насанд хүрэгчдийн хариуцлагагүй байдлаас үүдэн амьд явах, хайрлууах, сурч боловсрох, амар тайван амьдрах жам ёсны эрх хөсөр хаягдаж байгаа нь сэтгэл түгшээж байна. Хүүхэд хөгжил, хамгааллын асуудал бол зөвхөн хүчирхийлэлд өртсөн хүүхдүүдийн талаар ярьж буй асуудал биш юм. Хүүхдийг гэдсэн байхаас эхлэн хайрлаж, хамгаалах нь чухал.
Монгол Улсын сум бүрт мал хариуцсан гурван ажилтан байдаг бол хүүхэд хариуцсан ганц мэргэжилтэн алга" гэв.