ЭМЯ-наас эрт илрүүлгийн явцыг танилцуулав.
-Нийт 1.3 сая хүн энэ үзлэгт хамрагджээ. Хараахан амжаагүй байгаа иргэд хамрагдаарай. Энэ баасан гараг хүртэл үзлэг үргэлжилнэ. Байршлаар харвал нийслэл болон орон нутгийн иргэдийн хамрагдалт 50/50 хувь буюу ижил байна.
Насны бүлгээр харвал 0-18 хүртэл насны хүүхдүүдийн хамрагдалт хамгийн бага. Давхардсан тоогоор нийт 964 мянган хүн ямар нэг байдлаар өвчтэй байна гэж оношлогджээ. Тэдний 57 хувь нь ходоодны шарх, улайлт гэх мэт өвчтэй байгааг та бүхэн онцгой анхаараарай.
Дотоод шүүрэл, бодисын солилцооны өвчин, шээс бэлгийн тогтолцооны өвчин мөн их зонхиллоо. 0-18 насны хүүхдүүд, залуучуудын дунд шээс, бөөрний замын өвчин, залуучуудын дунд бэлгийн замын өвчлөл өндөр байна. Залуус бэлгэвч хэрэглэх, нэг хавьтагчтай байх тал дээр учир дутагдалтай байна.
Эдгээрийн дараа зүрх судасны өвчлөл түгээмэл байна. Сүүлийн арван жилд зүрх судасны өвчлөл нийт хүн амын дунд хамгийн их тархсан байсан бол эрт илрүүлгийн үр дүнд дөрөвдүгээрт оржээ. Үүнд зүрх судасны өвчний төвүүд олноор байгуулсан, олон нийт рүү чиглэсэн, мэдээлэл өгөх (таргалалтаас сэргийлэх, жингээ хасах, явган алхах, эрүүл хооллохыг зөвлөсөн мэдээллүүд) ажлууд үр дүнгээ өгчээ.
Тамхины хэрэглээ манай улсад өндөр хэвээр байна. Хүмүүс дотор татах нь буурсан гадаа гараад их татаж байна. Охид тамхи их татаж байна. Залуус ахмад настнуудын дэргэд тамхи татахаас эмээдэг байсан үе өнгөрчээ. Залууст тамхины хор хөнөөлийн талаар анхааруулахад хүлээн авдаггүй, уурлаж буримдаж байна. Тамхи татдаг иргэдийн дийлэнх нь эрэгтэйчүүд байсан бол одоо хүйсийн хувьд ялгаагүй болж байна.
Мөн нийт хүн амын дунд жимсний хэрэглээ бага байна. Өдөрт 400 гр-аас бага хэрэглэж байна.
Чихрийн шижин үзлэгт хамрагдсан нийт хүн амын 8.4 хувьд илэрсэн нь өндөр эрсдэл юм. Мөн хорт хавдрын тохиолдол олныг илрүүллээ. Үзлэгт хамрагдсанаар иргэд оношоо эрт мэдэж, өвчнөө эмчлүүлэхэд ихээхэн дөхөмтэй. Санхүүгийн хувьд бага зардал гаргах, хугацаа алдахгүй байх гэх мэт олон давуу талтай.
Хавдрын өвчтөнүүдийн 74 хувь нь хожуу үед оношлуулж байв. Одоо 65 хувь болж буурсан. Ходоодны хавдрын 44 тохиолдлыг эрт илрүүлгээр оношиллоо. Оношилсон нийт өвчний 90 гаруй хувиас урьдчилан сэргийлэх боломжтой байна.