Нийслэл хот бүхэлдээ цастай халтиргаа гулгаа үүсчихсэн нөхцөл байдалтай байгаа. Халтиргаанаас болж олон хүн эрүүл мэнд эд хөрөнгөөрөө хохирсон.
Тэгвэл ойр орчмынхоо цас мөсийг олон нийтийн дэмжлэгтэйгээр цэвэрлүүлэх челленжийг эхлүүлэхээр болжээ. Тодруулбал, МҮБХ-ны тэргүүн Ц.Магалжав дээр Улаанбаатар хотын ерөнхий менежер Ц.Төрхүү очжээ.
Тэрбээр Үндэсний бөхийн тэргүүнд хандаж "Иргэн хүн бүр ойр орчмынхоо 50 метр цас мөсийг цэвэрлэх ёстой гэсэн хуультай. Тийм болохоор Бөхийн холбооны тэргүүн та дэвжээний бөхчүүдээ уриалж энэ челленжид нэгдээчээ гэсэн хүсэлтийг тавьж байна. Цас мөс цэвэрлүүлэх ажилд олны хүч хэрэгтэй байна. Нийслэл бол бидний гэр гэсэн үг. Хууль дүрэмтэй улс шүү дээ. Хүн болгон хуулиа дүрмээ мөрдөх шаардлагатай байна. Бид бүхэн хамтарч ажиллах хэрэгтэй байна. ТҮК-ийн ажилчид үнэхээр хүчрэхгүй байна. Өглөөнөөс үдшийн бүрий болтол нуруугаа махийтал ажиллаж байна" гэжээ.
Харин Ц.Магалжав "Нийслэл хотдоо бөхийн залуучууд төрөлх нутгаасаа ирээд бэлтгэл сургуулилалт хийж амьдралаа авч явдаг. Нийслэлийн өнгө үзэмж чухал. Одоо цагаан сар болох гэж байна. Цагаан сар болох гэж байгаатай уялдуулж бөөндөө нийслэл хэмээх нэг гэр орноо цэвэрлэчихэд болно. Тиймээс Нийслэлээс санаачилж байгаа энэ санаачлагыг нийгмийн хариуцлагынхаа хүрээнд бөхчүүд би бүрэн дэмжиж ажиллана" гэлээ.
Түүнчлэн ингээд бүгдээрээ Нийслэл хэмээх том гэрээ цэвэрлэе. Бөхийн холбоогоор дамжуулаад аймаг сумаараа бөөндөө бужигнаж гудамж талбайгаа цэвэрлэхийг уриалж байна гэлээ.
Ингээд эхний бөх нь О.Хангай аварга, Хөвсгөлийн хүчтэн дэвжээний бөхчүүдийг дуудлаа. Мөн Завхан аймгийн Даян бөхийн дэвжээний хүчтэнүүдийг урьж, Архангай аймгийн Бөхбилэгт дэвжээний бөхчүүдийг идэвх санаачилгатай байж, цас мөс цэвэрлэж челленжид нэгдээрэй. Нийгэмдээ гоё зүйлийг түгээе гэв.
Дашрамд дуулгахад Архангай аймгийн Бөхбилэгт дэвжээний бөхчүүд цас мөс арилгасан зургаа олон нийтийн сүлжээнд тавьж, бусдыгаа уриалсан байсан юм.