Сар шинийн барилдаан нь Монгол улсад зохиогддог үндэсний бөхийн барилдаануудаас нэр хүндээрээ наадмын дараа орохуйц. Даваа наймаалцах үзэгдэл гардаггүй тул бөхийн хорхойтнуудын хамгаас шимтэн үздэг барилдаан энэ юм.
Бөхчүүд ч жилийн өнгөө урьтан шинжихээр энэ барилдаандаа хамаг хүчээ дайчлан барилдаж ирсэн. 1963 онд Нэгдэлчдийн баярын барилдаан хэмээх нэртэйгээр анх зохион байгуулагдахад дархан аварга Ж.Мөнхбат түрүүлж, аварга Ч.Бээжин үзүүрлэж байв. Үүнээс хойш коронавирус цар тахлын улмаас 2020, 2021 онд өнжсөн.
Хамгийн олон түрүүлсэн бөх нь дархан аварга Б.Бат-Эрдэнэ нийт 13 түрүүлсэний 11-т нь дараалан түрүүлжээ.
1963 оноос хойш “Бага наадам”-д түрүүлсэн аваргууд гэвэл Ж.Мөнхбат, Х.Баянмөнх, Д.Дамдин, С.Цэрэн, Д.Цэрэнтогтох, Д.Хадбаатар, О.Балжинням, Б.Бат-Эрдэнэ, Г.Өсөхбаяр, А.Сүхбат, Д.Сумъяабазар, Ч.Санжаадамба, С.Мөнхбат, Г.Эрхэмбаяр нар юм. Сар шинийн барилдаанд түрүүлсэн хамгийн бага цолтон бол Э.Мөнхжаргал бөгөөд тэрбээр 2022 оны Усан бар жилийн барилдаанд аймгийн заан цолтойгоор түрүүлсэн дээ. Тус барилдаанд түрүүлсэн аймгийн цолтой бөх (цэргийн арслан Ч.Санжаадамба, аймгийн хурц арслан Ш.Мөнгөнбаатар)хожмоо улсын цол авсан.
61 жилийн түүхэнд луу жилийн барилдаан нийт таван удаа тохиоход зөвхөн аварга цолтой бөх түрүүлж байжээ. Тухайлбал, 1964 оны луу жилийн барилдаанд дархан аварга Ж.Мөнхбат (тухайн үед улсын заан), 1976 оны луу жилд дархан аварга Ж.Мөнхбат, 1988 оны луу жилд дархан аварга Б.Бат-Эрдэнэ (тухайн үед улсын заан), 2000 оны луу жилд Б.Бат-Эрдэнэ, 2012 оны луу жилд аварга С.Мөнхбат нар түрүүлсэн байх юм. Тэгвэл энэ барилдаанд түрүүлж үзээгүй аварга бол (1963 оноос хойш төрсөн аваргуудаас) Ч.Бээжин, Н.Батсуурь, П.Бүрэнтөгс, О.Хангай нар байна. Тэд энэ барилдаанд түрүүлж үзээгүй боловч бүгд үзүүрлэсэн хүчтэнгүүд.
Луу жилийн барилдаанд үзүүрлэсэн бөх нь улсын начин Н.Дашдаваа (1964), улсын арслан Л.Сосорбарам (1976), улсын арслан Б.Ганбаатар (1988), улсын заан Ц.Магалжав(2000), улсын арслан Х.Мөнхбаатар (2012) нар билээ.