ОХУ-ын Ерөнхийлөгч Владимир Путин тус улсын олон хүүхэдтэй гэр бүлийн статусын тухай зарлигт гарын үсэг зурав. "Төр, нийгмийн хөгжилд гэр бүлийн үүрэг чухал" гэдгийг харгалзан энэхүү баримт бичигт гарын үсэг зурлаа гэж тэрээр онцолжээ.
Юуны өмнө уг зарлигаар дор хаяж гурван хүүхэд өсгөсөн бол өнөр гэр бүл гэж тодорхойлно. Энэ статус нь тодорхойгүй хугацаагаар тогтоогдоно.
Ийм гэр бүлийн хамгийн том хүүхэд нь 18 нас хүрээгүй бол, эсвэл өдрийн ангийн оюутан бол 23 нас хүртэл нь нийгмийн халамжийн арга хэмжээнд хамрагдана.
Мөн өнөр гэр бүл ямар дэмжлэг хүртэж болохыг тогтоолд заасан. Тэдэнд хүүхэд төрүүлж өсгөсөнтэй нь холбогдуулан төрөөс олгох тэтгэмж, төлбөр, хөдөлмөрийн харилцааны салбарт дэмжлэг үзүүлэх, гурав ба түүнээс дээш хүүхэд өсгөж хүмүүжүүлсэн эмэгтэйчүүдэд өндөр насны тэтгэврийг хугацаанаас нь өмнө олгох баталгаа бий болж байна.
Түүнчлэн ОХУ-ын төр нь эцэг эхчүүдэд хөдөлмөр эрхлэх боломжийг нь бүрдүүлэхийн тулд нэмэлт боловсрол мэргэжл олгохоос гадна улс орон даяар музей, цэцэрлэгт хүрээлэн, үзэсгэлэн, бусад соёлын арга хэмжээнд үнэ төлбөргүй оролцох эрхийг нь хангах үүрэгтэй.
Өнөр гэр бүлийн статусыг баталгаажуулах гэрчилгээ олгоно. Мөн тийм өрхүүдийн талаарх мэдээлэл, тэр дундаа тэдэнд үзүүлж буй нийгмийн дэмжлэгийн арга хэмжээг бүртгэх зорилгоор нэгдсэн мэдээллийн сан хөтөлнө.
Мөн өнөр гэр бүлүүд орон сууц, нийтийн аж ахуйн үйлчилгээний тэтгэмж авах боломжтой бөгөөд бага насны хүүхдүүд үнэгүй эм тариа авна. Тухайлбал, өнөр бүлийн зургаа хүртэлх насны хүүхэд эмчийн жороор олгох эмийг үнэ төлбөргүй авах, сургуулийн сурагчид нь нийтийн тээврээр (автобус, трамвай, метро) үнэ төлбөргүй зорчих бөгөөд сургууль дээрээ үнэ төлбөргүй хооллох, коллеж, сургуулийн дүрэмт хувцасыг үнэгүй олгоно. Хүүхдийг цэцэрлэгт дараалал үл харгалзан оруулах үүрэгтэй.
Олон хүүхэдтэй өрх байр орон сууц, нийтийн үйлчилгээний тэтгэмжийг тогтоосон төлбөрийн дүнгийн 30 хувиас багагүй хэмжээний хөнгөлөлт авах боломжтой болно.
Мөн Путин өнөр гэр бүлүүдэд төрөөс нэн түрүүнд тусламж үзүүлэх, эцэг эхчүүдийг бизнес эрхлэхэд нь дэмжлэг үзүүлэхийг тушаажээ.
Путин арваннэгдүгээр сард тус улсад 2024 оныг "Гэр бүлийн жил" болгон зарласан. ОХУ-д өнөр гэр бүлд зориулсан загвар бий болсонд баяртай байгаагаа Ерөнхийлөгч мэдэгдэв. Тэрээр өнөр өтгөн гэр бүлийн уламжлалыг сэргээхийн чухлыг онцолж, гэр бүлийн үнэ цэнийг бэхжүүлэхэд дээд зэргээр анхаарахыг уриалав.
Эх сурвалж: Лента.ру