Гайана, Венесуэл улсын төрийн тэргүүнүүдийн уулзалтын дараа "хүч хэрэглэхээс" зайлсхийж, газрын тосоор баялаг Эсэкибо бүс нутгийн маргаанаас үүдсэн хурцадмал байдлыг нэмэгдүүлэхгүй байхаар тохиролцов.
Гайаны улсын Ерөнхийлөгч Ирфаан Али, Венесуэлийн Ерөнхийлөгч Николас Мадуро нар пүрэв гарагт Кингстаун нисэх онгоцны буудалд (Сент-Винсент ба Гренадин) Латин Америкийн орнуудын төлөөлөгчдийн хамт хэлэлцээ хийлээ.
Тэд хамтарсан мэдэгдэл гаргаж, "Ямар ч нөхцөлд бие биенээ заналхийлэхгүй, хүч хэрэглэхгүй", "Үг болон үйлдлээр хурцадмал байдлыг хурцатгахгүй" гэдгээ амлажээ.
Газрын тосоор баялаг Гайана-Эссекибо бүс нутаг нь Гайана улсад харьяалагддаг ч Венесуэл олон арван жилийн турш эзэмшлийн талаар маргаантай байсаар ирсэн. 2015 онд Эссекибо хотын ойролцоо газрын тосны томоохон орд илрүүлснээр маргалдаан хурцадсан.
Арванхоёрдугаар сарын эхээр Мадуро энэ маргаантай газар нутгийн асуудлаар Венесуэлд бүх нийтийн санал асуулга явуулсан бөгөөд сонгогчдын 95 гаруй хувь нь тус газар нутаг дээр бүрэн эрх тогтоохыг дэмжсэн юм. Үүний дараа Венесуэлийн удирдагч Эссекибо дахь газрын тосны ордуудыг ашиглахыг зөвшөөрснөө мэдэгдэв.
Одоо хоёр улсын удирдагчид маргаантай бүсэд үүссэн аливаа асуудлыг шийдвэрлэхийн тулд Гадаад хэргийн сайд нарын хамтарсан комисс байгуулах, мөн Эссекибогийн асуудлыг хэлэлцэхээр Бразилд шинэ уулзалт хийхээр тохиролцсон байна.
Мөн тэдний мэдэгдэлд бүх маргааныг олон улсын хуулийн дагуу шийдвэрлэнэ гэсэн ч Мадурогийн засгийн газар Олон улсын шүүхийн харъяаллыг хүлээн зөвшөөрөхгүй байгааг тэмдэглэжээ.
Ирфаан Али уулзалтын үеэр Гайана улсын газрын зурагтай бугуйвч зүүсэн байсан бөгөөд үүнд Эссекибо багтсан байв.
"Гайана бол түрэмгийлэгч биш, Гайана дайн эрэлхийлдэггүй, гэхдээ Гайана улс эх орныхоо батлан хамгаалахын төлөө бүх түншүүдтэйгээ хамтран ажиллах эрхтэй" гэж тэр хэлэв.
Далайн газрын тосны нөөц илэрсэнтэй холбоотой Гайана улсын эдийн засаг эрчимтэй хөгжиж байна. 2027 он гэхэд газрын тосны олборлолтын хэмжээ гурав дахин нэмэгдэж, өдөрт 1.2 сая баррелиас давах төлөвтэй байна.
Харин үүний нөгөө талд газрын тосны батлагдсан нөөцөөрөө дэлхийд тэргүүлдэг Венесуэл улс эдийн засгийн гүн хямралд ороод байна.
2018 онд Мадурог сонгогдсоны дараа Венесуэлийн газрын тос, байгалийн хий, алтны уурхайн салбарт АНУ-аас авсан хориг арга хэмжээ нь нөхцөл байдлыг улам хурцатгаж байна.
Эх сурвалж: ВВС