Жо Байден, Ши Жиньпин нар Сан-Франциско хотноо уулзаж, АНУ-БНХАУ-ын харилцаа хурцдахад нөлөөлсөн асуудлуудыг хөндөв
Эдийн засгийн өрсөлдөөн, цэрэг зэвсэг, дипломат харилцааны асуудал зэргээс шалтгаалан сэвтсэн харилцаагаа сэргээх зорилготойгоор АНУ-ын Ерөнхийлөгч Жо Байден, БНХАУ-ын Ерөнхийлөгч Ши Жиньпин нар нэг жил орчмын дараа АНУ-ын Сан-Франциско хотноо уулзалдлаа.
Дөрвөн цаг орчим үргэлжилсэн уулзалтаар "Бодит ахиц дэвшил гарсан" гэж Жо Байден мэдэгдсэн байна. Тэрбээр энэ хэлэлцээг "Бидний хийсэн хамгийн бүтээлч, үр дүнтэй хэлэлцээ боллоо" гээд "АНУ, БНХАУ-ын өрсөлдөөнийг зөрчил мөргөлдөөн болгон даамжруулахгүй байхыг баталгаажуулж, харилцааг хариуцлагатай байдлаар зохицуулах ёстой" гэдгийг тодотгов.
Харин БНХАУ-ын Ерөнхийлөгч Ши Жиньпин "АНУ-тай нөхөрсөг харилцаатай байхыг эрмэлзэж байгаа"-гаа мэдэгдлээ. Энэ нь дэлхийн хамгийн том эдийн засагтай хоёр улсын хооронд энх тайван харилцаа тогтоох хүсэлтэй байгаагаа илэрхийлсэн түүний хамгийн тод мэдэгдлүүдийн нэг болж байна.
Ши Жиньпин АНУ-ын Ерөнхийлөгч Жо Байдентай уулзсаныхаа дараа Сан Франциско хотод томоохон компаниудын Гүйцэтгэх захирлуудад хандан хэлсэн үгэндээ "БНХАУ АНУ-ын байр суурьд халдах санаархалгүй байдаг" гэж тодотгожээ. Түүнчлэн тэрээр “БНХАУ хөгжлийн аль ч шатанд хүрсэн бай, хэзээ ч ноёрхол, тэлэлтийн араас хөөцөлдөхгүй. Мөн нөлөөллийн хүрээг эрэлхийлдэггүй, аль ч талтай ямар нэг дайн хийхгүй” хэмээн уулзалтын дараах хамтарсан хэвлэлийн хурлын үеэр онцоллоо.
Төрийн тэргүүн нарын уулзалтын үр дүнд хоёр улс цэрэг, армийн дээд түвшний яриа хэлэлцээгээ сэргээхийн зэрэгцээ мансуурах бодис, түүний орцуудын наймааны эсрэг үйл ажиллагааг хүчитгэхээр болсон байна. Түүнчлэн АНУ, БНХАУ хиймэл оюуны асуудлаар яриа хэлэлцээ хийх ажлын хэсэг байгуулахаар тохиролцсон бөгөөд Вашингтоны зүгээс хиймэл оюуны технологийн хамгаалалтыг сайжруулах шаардлагатайг онцолжээ.
