Орос-Украины дайны эхэлсний дараа дайныг зогсоох уриалга явуулсан Орос эмэгтэйд долоон жилийн хорих ял оноохоор болжээ.
Өмнөх шүүх хурлаар улсын яллагч түүнд найман жилийн хорих ял болон гурван жил интернэт ашиглах эрхийг нь хязгаарлах шийтгэл оноож өгөхийг хүссэн юм.
2022 оны гуравдугаар сарын 31-нд 33 настай зураач бүсгүй Александра Скочиленко Санкт-Петербург дахь нэгэн дэлгүүрийн барааны үнийн шошгыг дайныг зогсоох тухай агуулгатай цаасаар сольсон юм. Тухайн үед дэлгүүрийн худалдагч түүний уг үйлдлийн талаар гомдол гаргаж, зураач бүсгүй саатуулагдаж байв.
Түүнийг Оросын төрийг үзэн ядсандаа ноцтой гэмт хэрэг үйлдсэн хэмээн буруутгасан. Тодруулбал түүнийг ОХУ-ын зэвсэгт хүчний талаар худал мэдээлэл тараасан зүйл ангиар шүүсэн бөгөөд энэ тохиолдолд 10-15 жил хүртэл хорих ял сонсдог аж.
Шошгын оронд наасан нэгэн мэдээлэлд "Оросын арми 400 орчим хүн нуугдаж байсан Мариуполь хотын театрыг бөмбөгдсөн" гэсэн байна. Харин үүнийг Москвагийн зүгээс худал хэмээн эсэргүүцсэн.
