Украины Батлан хамгаалахын сайд Алексей Резниковыг албан тушаалаас нь чөлөөлсөн тухай Ерөнхийлөгч Володимир Зеленский мэдэгдлээ.
Резников 2022 оны хоёрдугаар сард ОХУ-ын довтолгоо эхлэхээс өмнө тус яамыг удирдаж байсан юм.
Ням гарагийн үдэш олон нийтэд хандаж хэлсэн үгэндээ Зеленский Батлан хамгаалах яаманд нийгэмтэй харьцах шинэ арга зам хэрэгтэй гэжээ. Улмаар Украины төрийн өмчийн санг удирдаж байсан Рустем Умеровыг Батлан хамгаалахын сайдад нэр дэвшүүллээ.
Украины хэвлэлүүд Резниковыг Лондон дахь Элчин сайдаар томилно гэж таамаглаж байна.
57 настай Резников Украинд дайн эхэлснээс хойш олны танил болсон нэгэн. Олон улсад хүлээн зөвшөөрөгдсөн тэрээр Украины барууны холбоотон орнуудтай хийх уулзалтад тогтмол оролцож, цэргийн нэмэлт техник хэрэгсэл авах лоббид чухал үүрэг гүйцэтгэсэн юм. Гэвч түүнийг огцруулах нь цаг хугацааны асуудал байсан. Өнгөрсөн долоо хоногт Резников сэтгүүлчидтэй уулзахдаа өөр албан тушаалд очихоор Ерөнхийлөгч Зеленскийтэй ярилцаж буйгаа хэлсэн.
Резниковыг авлигын хэрэгт буруутгаагүй ч Батлан хамгаалах яаманд армийн бараа, техник хэрэгслийн худалдан авалттай холбоотой хэд хэдэн дуулиан дэгдээд байгаа билээ.