Хятад 9 дүгээр сарын 2-ноос хүүхдүүд ухаалаг гар утас буюу утасны програмуудыг ашиглах хугацааг хязгаарлахаар болсон байна. Мэдээж, энэхүү шийдвэрийг гаргахаас өмнө олон нийтийн дунд багагүй хэлэлцүүлэг өрнүүлсэн байна. Хүүхдийг ухаалаг утасны донтолтоос хамгаалах зорилгоор “хүүхдийн горим”-д тохируулснаар утсан дээрх програмуудаа өдөрт хамгийн ихдээ 2 цаг ашиглах юм. Мөн 8-өөс доош насны хүүхэд өдөрт 40 минутаас илүүгүй хугацаанд гар утсан дээрх програмуудаа ашиглах, бүх насны хүүхэд оройн 22 цагаас өглөөний 06 цаг хүртэл утсаа бүрэн хаахаар болсон юм. Гэхдээ энэхүү шинэ дүрмийг өөрийн хүүхдэд мөрдүүлэх үү, хугацааг хэрхэн зохицуулах вэ гэдгээ эцэ эх нь шийдэх эрхтэй гэнэ. Ихэнх эцэг эх энэхүү шийдвэрийг талархалтайгаар хүлээн авсан ч сөрөх хүмүүс ч байгаа гэнэ. Тухайлбал, Weibo сүлжээнд энэ мэдээллийг нийтэлсний дараа “ Хэрэв бүх зүйлийг бүрэн хянах гэж оролдвол эцэст нь юуг ч хянах боломжгүй болно доо” хэмээн сэтгэгдэл бичсэн иргэн олон зуун лайк цуглуулсныг харахад сөрөх хүн ч байгаа аж.
Энэхүү зохицуулалт нь Хятадын эрх баригчдын зүгээс дижитал зугаа цэнгэлийн салбарыг хянах гэсэн анхны алхам биш. БНХАУ-д 2019 онд насанд хүрээгүй хүүхдүүдийн видео тоглоом тоглоход зарцуулах дээд хугацаанд хязгаар тогтоож байсан юм. Анх бямба, ням гарагт 90 минут гэсэн хязгаар тогтоож байсан бол 2021 оноос баасан, амралтын өдрүүд мөн баярын өдрүүдэд нэг цаг тоглохыг зөвшөөрсөн байна. Мөн гар утасны тоглоомын програмд донтохоос сэргийлэхийн тулд хэрэглэгч заавал өөрийн нэр, паспортын дугаараар бүртгүүлдэг болсон юм.
Тайванйн Үндэсний их сургуулийн профессор Тай Ю Ху “ Хятал улс үндэсний аюулгүйн үзэл баримтлалынхаа дагуу, интернэт орчин, зугаа цэнгэл, залуучуудад онцгой анхаарал хандуулдаг. Сүүлийн үеийн статистик мэдээллээр 2023 оны зургадугаар сард Хятадад интернэтийн хүртээмж 76 хувьд хүрчээ. Интернэт хэрэглэгчийн тоо өсөхийн хэрээр гар утсан дээрх тоглоом, видео апп-ыг капитализмаас үүдэлтэй зугаа цэнгэл гэж харах нь нэмэгдсэн. Ши Жинпин Хятадын Засгийн эрхэнд гарснаас хойштөрийн үзэл суртал өдөр тутмын зужгаа цэнгэлийн салбарт ч нэвтрэх хандлагатай болсон” гэж онцолсон байна.
Дээрх шийдвэртэй холбоотойгоор Хятадын эцэг эхчүүд ухаалаг утасны хэрэглээг хязгаарлах нь хүүхдүүдэд хэрхэн нөлөөлөх талаар гайхаж байхад Хятад технологийн компаниуд техник, технологийн талаас нь хэрхэн шийдэх талаар толгой гашилгаж байна. Эрх баригчдын шийдвэрийн талаар мэдээлэл гарсан өдөр Хятадын мэдээлэл технологийн хэд хэдэн компанийн хувьцаа унасан байна. Жишээлбэл, Weibo, Bilinili, Kuaishou, WeChat мессенжерийн оператор Tencent зэрэг компанийг дурдаж болно.