АН-ын нэр барьсан хууль бус этгээдүүд Улсын Дээд шүүхэд нөлөөлөх гэж оролдож байгаа талаар АН албан ёсоор байр сууриа илэрхийлж мэдээлэл хийж байна.
Тодруулбал, Өчигдөр буюу /2022.05.18/-ны өдөр УИХ-ын гишүүн, УИХ дахь Ардчилсан намын бүлгийн гишүүн Ш.Адьшаа, О.Цогтгэрэл, Н.Ганибал, А.Адъяасүрэн, Ц.Туваан нар Монгол Улсын Их Хурлын тухай хуульд нэмэлт өөрчлөлт оруулах тухай хуулийн төслийг Улсын Их Хурлын дарга Г.Занданшатарт өргөн мэдүүлсэн юм.
Энэ талаар УИХ-ын гишүүн, УИХ дахь АН-ын дарга Д.Ганбат, "Өнгөрсөн гуравдугаар сарын 30-нд АН-ын дүрмийг УДШ бүртгэж авсан. Энэ дүрмийн дагуу үйл ажиллагаа явуулж байгаа. АН УИХ-д бүлгээ байгуулсан. Зохих эрх бүхий байгууллага, Үндэсний Бодлогын Хороо хоёр долоо хоногийн өмнө хуралдаад, дүрмийн өөрчлөлтийн дагуу үйл ажиллагаа явуулж байна. Эндээс АН-ын бүлгийн дүрмийг өөрчлөх ажлын хэсэг байгуулагдаад ажиллаж байна.
Монгол Улс хуультай, АН дүрэмтэй үүнийхээ дагуу явна. Гэтэл хэсэг бүлэг гишүүд нэгдэж, хууль өргөн барьсан байна. Албан тушаал, эрх мэдэл булаацалдсан нөхцөл байдал үүсээд байна. АН-ын бүлгийн дарга хийнэ гэдэг амар ажил биш, ямар нэг эрх ямба эдэлдэггүй. Эрх барьж байгаа олон суудалтай намын зөвийг дэмжиж, бурууг засч явах ёстой бүлэг. Иймээс АН-ын бүлгийн өмнөөс, гишүүдийхээ өмнөөс ард түмнээсээ уучлал хүсмээр байна. 2020 оны сонгуулиар 11 хүн их хуралд орсон. Гэтэл мордохын хазгай гэгчээр шинэ гишүүдийг хойно нь залдаг, удирддаг хүмүүс байдаг.
Нэг нам олонх болчихсон энэ үед шударга нэрээр гарч ирсэн, байгалийн баялагийг ард түмэнд нь эзэмшүүлнэ гэсэн тэр явдал хаана байна. Бид их баялагтай, ядуу амьдрахааргүй ард түмэн. Гаднаас хамааралгүй, ард түмнийхээ төлөө зүтгэж чадах ганц улс төрийн хүчин бол АН юм.
Ардчиллын тулгын гурван чулууны тулгуур баганы нэг бол хараат бус шүүх юм. Тиймээс шүүхэд нөлөөлөх ёсгүй" гэж өөрийн байр сууриа илэрхийллээ.
