Манай улсад айлчилж буй Папын болон Гэгээн Ширээт Улсын аюулгүй байдлыг Швейцар харуулын алба хангаж ажилладаг байна.
Швейцар харуулын алба нь 15 дугаар зуунд буюу 1506 онд үүсэн байгуулагдсан. Анхлан Папын эзэмшил нутаг, Ариун Ромын эзэнт гүрний хооронд үүссэн зөрчлөөс үүдэж Пап Сикстус өөрийн болон Ватиканы аюулгүй байдлыг хангах, зэвсэгт мөргөлдөөнд хүч нэмэх зорилгоор Швейцараас 200 хөлсний дайчдыг элсүүлэн авснаар бий болсон түүхтэй.
Папын засаг захиргаа, Ариун Ромын эзэнт гүрний хооронд өрнөсөн 20 гаруй жилийн мөргөлдөөнд Папын засаг захиргаа ялагдал хүлээх нөхцөл үүссэн үед захирагч Каспар фон Силенений удирдлага дор 150 Швейцар цэрэг Ром руу маршлан очиж, Пап Жулиусийг хамгаалж, түүний засаг захиргааг авч үлдсэн гэдэг. Католик шашны итгэл үнэмшил, үнэнч байдал нь 1500 жилийн түүхтэй Папын засаг захиргааг хамгаалан үлдэхэд үнэтэй хувь нэмэр оруулсан тул Швейцар харуулын албыг 1506 онд байгуулсан.
Анх байгуулагдсанаас хойш дайн тулаанд оролцох, Папын аюулгүй байдлыг хангах, ёслолын ажиллагаанд оролцох зэргээр үүрэг гүйцэтгэж ирсэн Швейцар харуулын алба 1988 онд Пап Ион Паулын амь насанд халдах оролдлого гарснаас хойш зарим тооны харуулыг гэрээт энгийн хамгаалалттай хослуулан үүрэг гүйцэтгэж эхэлсэн байна.
Одоогийн байдлаар Швейцар харуулын албанд 135 хүн ажилладаг. Уг албанд орж ажиллахад католик шашинтай байх, дээд сургууль төгссөн байх, Швейцарын зэвсэгт хүчинд алба хаасан байх, Швейцар Улсын иргэн байх зэрэг шаардлагыг тавьдаг байна.
Швейцар харуулын албанд орсноос хойш 5 жилийн дараа гэр бүл зохиохыг зөвшөөрдөг байна.
