- Энэ сарын 23-нд Вагнер бүлгэмийн онгоц осолдсон
- Амиа алдсан 10 хүний дунд удирдагч Пригожин байсан юм
- Түүнийг төрөлх Санкт-Петербург хотод нь оршуулжээ
Вагнер хувийн цэргийн бүлгэмийн удирдагч Евгений Пригожин онгоцны ослоор амиа алдсан. Түүнийг өөрийнх нь төрөлх хот болох Санкт-Петербургт, аавынх нь дэргэд оршуулсан бөгөөд ёслолыг ойр дотнын хүмүүсийн хүрээнд явуулсан аж.
Энэ сарын 23-ны өдөр Вагнер бүлгэмийн нисэх онгоц осолдож, 10 хүн амиа алдсан. Онгоцонд бүлгэмд нөлөө бүхий долоон хүн, онгоцны гурван ажилтан зорчиж явсан юм. Олон хүн осолд Кремлийг буруутгаж байсан ч Кремлиэс үүнийг үгүйсгэсэн.
Хоёр сарын өмнө Пригожин “Шударга ёсны төлөөх” зэвсэгт бослого эхлүүлж, зөвшилцсөний үр дүнд бослогоо зогсоож байсан. Улмаар түүнийг Беларусь руу явуулах шийдвэр гарсан ч хаана байгаа нь мэдэгдэхгүй хэсэг хугацаа өнгөрсөн юм.
Тэрбээр осол болохын өмнөхөн Африкаас хийсэн бичлэгтээ "Африкийг илүү эрх чөлөөтэй болгоно" хэмээн мэдэгдэж байв.
Эх сурвалж: ВВС
