Бараг зургаан сарын өмнө Гааг дахь Олон улсын эрүүгийн шүүх түүнийг баривчлах шийдвэр гаргаснаас хойш Владимир Путин анх удаагаа гадаад айлчлал хийхээр төлөвлөж байна. Энэ айлчлалаа ирэх аравдугаар сард хийх юм байна. Энэ айлчлалын тухайд Оросын цэргүүд Украин руу довтлохоос өмнөхөн "хязгааргүй түншлэлийн талаар" тохиролцсон улс орныг сонгосон нь гайхах зүйл биш юм.
Кремль "Бүс ба Зам" чуулга уулзалтад оролцохоор Хятадад хийх Путины айлчлалд бэлтгэж байна гэж ойрын эх сурвалжийн гурван хүн Bloomberg-т ярьжээ. Тэдний нэгний дурдсанаар, Ерөнхийлөгч Путин БНХАУ-ын дарга Ши Жиньпиний урилгыг хүлээн авч, "Бүс ба Зам санаачилга" хэмээх олон улсын дэд бүтцийн томоохон төслийн дээд хэмжээний уулзалтад оролцоно. Энэ бол "COVID-19"-ийн тахлын дараах анхны уулзалт юм гэжээ.
Ши Жиньпин өнгөрсөн гуравдугаар сард Москвад төрийн айлчлал хийх үеэрээ Путиныг форумд урьсан юм. Мөн тэр сард Гаага дахь Олон улсын эрүүгийн шүүх Оросын ерөнхийлөгчийг Украины эзэлсэн нутаг дэвсгэрээс хүүхдүүдийг хууль бусаар албадан гаргасан цэргийн гэмт хэрэгт буруутгаж баривчлах шийдвэр гаргасан юм.
Түүнээс хойш Путин хилийн чанадад айлчлаагүй байгаа бөгөөд ялангуяа тун чухал ач холбогдолтой Өмнөд Африкт болох БРИКС-ийн дээд хэмжээний 8-р уулзалтад оролцоогүй юм. Тэрээр мөн ирэх есдүгээр сард Делид болох “Их 20”-ийн дээд хэмжээний уулзалтад оролцохгүй гэдгээ Энэтхэгийн Ерөнхий сайд Нарендра Модид мэдэгджээ.
Путин зөвхөн аюулгүй байдлын алба нь түүнийг бүрэн хамгаалж чадах улс орнуудад айлчлахад бэлэн байгаа бөгөөд Хятад бол тэдний нэг гэж Bloomberg-ийн хоёр эх сурвалж мэдэгдэв.
Эх сурвалж: moscowtimes.ru