Вагнер PMC-ийн тэргүүн Евгений Пригожин нас барсны дараах анхаарал татсан асуултуудын нэг бол түүний үхэл Оросуудын Африк дахь оршин тогтнолд хэрхэн нөлөөлөх вэ гэсэн асуулт юм.
Украинд түрэмгийлсэнтэй холбогдуулан Орост нүүрлэсэн олон улсын эдийн засгийн хатуу хориг арга хэмжээ, улс төрийн ганцаардал зэргээс болж Кремль Африкийн орнуудад нөлөөгөө бэхжүүлэхийг хичээж байна.
Сүүлийн жилүүдэд Вагнер энэ тивд Оросын ашиг сонирхлыг дэмжихэд чухал үүрэг гүйцэтгэсэн. Хөлсний цэргүүдийн бие бзрэлдэхүүн Ливи, Судан, Мали, Төв Африкийн Бүгд Найрамдах Улс, Мозамбик, Буркина Фасо, Нигер зэрэг орнуудын хэрэгт оролцож байна.
Үндсэндээ тэд Кремльд ашигтай хувьсгал, төрийн эргэлтийг дэмжих зэрэг эрх мэдлийн даалгавруудыг гүйцэтгэдэг. Эдгээр улсад “Вагнерчууд” энгийн иргэдтэй зүй бус харьцаж байсан олон баримт нотолгоо байгааг олон улсын байгууллагууд нэг биш удаа хэлж байв.
Нэмж дурдахад, цэргийн мөргөлдөөнийг судалдаг Британийн шинжээч Майк Мартин хэлэхдээ, Африкийн дүрвэгсдийн Европ руу чиглэсэн ихэнх маршрутыг Вагнерчууд хянадаг гэжээ.
Энэ бүхэн нь Владимир Путины Африк руу чиглэсэн улс төрийн бодлогод хүчирхэг хөшүүрэг бий болгосон. Гэвч одоо Путин хяналтгүй үлдсэн хөлсний цэргүүдтэй харилцах шинэ хэлбэрийг олж чадах болов уу, вагнерчууд өөрсдөө Кремлийн мэдэлд үлдэхийг хүсэх үү, Тэгэхгүй бол Орос цаашид яаж Африктай "зууралдах" вэ гэсэн ар араасаа цуварсан олон асуудалтай тулгарч байна.
Генерал Аверьянов Пригожиныг Африкт орлох шинэ нүүр царай юу
Брукингсийн хүрээлэнгийн стратеги, аюулгүй байдлын шинжээч Ванда Фелбаб-Браун "Владимир Путин Вагнерийн ангиудыг Африк, Ойрхи Дорнодод байлгахыг хүсч байгаа ч түүний цэргүүдийн Евгений Пригожинд үнэнч байдлыг сулруулахын тулд удирдлагын бүтцэд томоохон цэвэрлэгээ хийх болно гэж үзэж байна. Ингэснээр Кремльтэй шууд харилцаагаа бэхжүүлнэ.
"Путинд тохирсон бүтцийн өөрчлөлт, түүний дотор Орос, Украин дахь үйл ажиллагаанд оролцуулах. Ингэхдээ Оросын зэвсэгт хүчинд бие бүрэлдэхүүний нэг хэсгийг шилжүүлж, үлдсэн хэсгийг нь шинэ удирдлагын дор хэсэгчлэн зэвсгийг нь хурааж, хагас бие даасан байдлаар үйл ажиллагааны эрх чөлөө олгох иймэрхүү зураглал харагдаж байна" гэж Фелбаб-Браун бүр 6-р сард Пригожиний бүтэлгүйтсэн бослогын дараахан хэлж байв.
Эрэн сурвалжлах сэтгүүлч, Bellingcat төслийн үүсгэн байгуулагч Христо Грозев Оросын Тагнуулын Ерөнхий газар/ГРУ/-ын генерал Андрей Аверьяновыг Африкийн чиглэлд Оросын шинэ хамгаалагчдын нэг болж магадгүй гэж үзэж байна.
Грозевын хэлснээр, Аверьянов дэлбэрэлт зохион байгуулах, Новичокт хордуулах зэргээр дэлхий даяар ГРУ-гийн -ийн нууц ажиллагааг явуулдаг гол хүн. Тэр Скрипалд аав, охин хоёрыг Новичокоор хордуулах халдлагыг зохион байгуулагч гэж Грозев бичжээ.
Түүнчлэн Пригожины амь насыг бүрэлдэгэхэд Аверьянов оролцсон байж магадгүй гэж тэр үзэж байна. 7-р сард болсон Орос-Африкийн дээд хэмжээний уулзалтын үеэр генерал Аверьяновыг Путин Африкийн орнуудын төлөөлөгчдөд танилцуулсан нь тэнд /Африкт/ тодорхой үүрэг гүйцэтгэж байгааг харуулж байна.
Вагнерын Африк дахь "эзэнт гүрэн"-ий задрал эхлэх үү
Пригожингүйгээр Вагнер хөлсний армийг аврах боломжгүй гэж зарим ажиглагчид үзэж байна. Гол нь түүний бүтэц дэх хувийн эрх мэдэл, нэр хүндэд төдийгүй тус компанийн үйл ажиллагааны онцлог, ялангуяа Африк, Ойрхи Дорнодод байгаа юм.
"Вагнерын Африк дахь эзэнт гүрэн"-ий ихэнх хэсэг нь худал мэдээлэл түгээх ажиллагаа, арилжааны ашиг сонирхол, бүдүүлэг хөлсний ажил дээр суурилж байсан. Түүнчлэн Пригожин өөрөө болон түүний хамтрагчдын хувийн хагас дээрмийн холбоонд тулгуурладаг байсан гэж Guardian-ын улс төрийн тоймч Питер Бомонт бичжээ.
Мэдээжийн хэрэг, Кремль Африкийн удирдагчдыг шүүхийг оролддог, ялангуяа цэргийн дэглэмтэй улс орнуудад. Гэхдээ Пригожин бол тэндхийн хээрийн цэргийн удирдагчид, цэргийн эргэлтийн эзэд, авлигад идэгдсэн улс төрчид, бизнес эрхлэгчидтэй нягт холбоо тогтоосон байсан гэж Бомонт бичжээ. Энэ бол огт өөр түвшний оролцоо, боломж гэж үзэж байна.
"Африк дахь Орос" номын зохиолч, Британийн улс төр судлаач Самуэль Рамани мөн Вагнерийн үүсгэн байгуулагч, командлагч Дмитрий Уткины үхэл хэрэв батлагдвал байгууллагын үндсийг бүрэн өөрчлөх нь газар хөдлөлтийн дайтай үйл явдал гэж нэрлэж байна.
Пригожинд үнэнч үлдсэн, Оросын армийн удирдлагыг үл тоомсорлодог 25,000 дайчдыг яах вэ
Кремль аль эрт Вагнерчуудаас татгалзахаар шийдсэн байсан. Тухайлбал, ГРУ-гийн цэргийн тагнуулын албанд өмнө нь Африк дахь Вагнерын ихэнх хэсгийг хөлсний өөр бүлэглэлээр солих төлөвлөгөө боловсруулах үүрэг өгсөн гэж BBC-ийн аюулгүй байдлын сурвалжлагч тус бүлэглэлийн ойрын эх сурвалжаас иш татан мэдээлжээ.
Евгений Пригожин үүнийг эрс эсэргүүцсэн бөгөөд түүнийг тойрон хүрээлэгсдийнх нь ярьснаар тэрээр хэдхэн хоногийн өмнө Малигаас Орост ирж, ийм зохицуулалтыг хүлээн зөвшөөрөх боломжгүй гэж хэн нэгэнд итгүүлэх гэж ирсэн байжээ.
Одоо бол Вагнер PMC-ийн ирээдүйг бүхэлд нь Владимир Путины гарт үлдээв. Кремль өөр олон асуудалтай тулгарах болно. Тэдний нэг нь нас барсан удирдагчдаа үнэнч, Оросын армийн удирдлагыг үл тоомсорлодог 25,000 дайчдыг яах вэ.
Эх сурвалж: ВВС
