ОХУ-ын Ерөнхийлөгч Владимир Путин "Вагнер"-ийн үүсгэн байгуулагч Евгений Пригожинийн онгоцны ослоор амиа алдсан хүмүүсийн ар гэрийнхэнд эмгэнэл илэрхийлэв.
Путин бизнесмэн болон түүний хамтрагчдын үхлийн талаар тайлбар хийсэн байна. "Одоо яригдаж буй мэдээллээр бол Вагнер компанийнхан тэнд /онгоцонд/ байсан гэдгийг харуулж байна" гээд тэр Вагнерчуудын гавьяаны тухай ярьжээ.
"Миний мэдэж байгаагаар Пригожин Африк тивээс буцаж ирээд, зарим албаны хүмүүстэй уулзсан" гэж Путин хэлжээ.
"Би Пригожинийг 90-ээд оны эхэн үеэс хойш мэддэг байсан. Тэрээр хүнд хэцүү хувь тавилантай хүн байсан бөгөөд амьдралдаа ноцтой алдаа гаргаж байсан ч хүссэн зорилго, үр дүндээ хүрсэн. Тэр авьяаслаг хүн, авъяаслаг бизнесмен байсан" гэж ерөнхийлөгч хэлэв.
Faridaily телеграм сувгийн мэдээлснээр Пригожин өөрөө 2000-аад оны эхээр Путинтэй New Island ресторанд анх уулзсан гэж мэдэгдэж байжээ.
Пригожингийн эзэмшдэг бизнес тийрэлтэт онгоц өмнөх шөнө Тверь мужийн Куженкино тосгоны ойролцоо осолдсон. Холбооны агаарын тээврийн агентлаг онгоцонд Евгений Пригожин хэмээх зорчигч явсан тухай шуурхай мэдээлэв.
Холбооны агаарын тээврийн агентлагийн жагсаалтын дагуу онгоцонд долоон зорчигч, багийн гурван гишүүн нийт 10 хүн ниссэн байна. Тэд бүгд үхсэн. Амиа алдагсдын цогцос маш их гэмтсэн, хэн болохыг тогтоохын тулд генетикийн шинжилгээ хийх шаардлагатай гэж хэвлэлүүд мэдээлж байна. "Нас барагсдын биологийн материалыг генетикийн шинжилгээнд оруулахаар Москва руу илгээсэн" гэж Пүрэв гарагийн үдээс хойш Baza Telegram сувагт бичжээ.
Хэргийг мөрдөн шалгах ажлыг Мөрдөн байцаах хорооны онцгой чухал хэргүүдийг мөрдөн шалгах үндсэн хэлтсийн мөрдөн байцаагч Иван Сибулад даалгасан бөгөөд тэрээр онгоцны ослын талаар олны анхаарлыг татсан хэргүүдийг урьд нь мөрдөн шалгаж байжээ.
Гэсэн хэдий ч одоогоор Пригожин нас барсныг албан ёсоор зарлаагүй байна. Вагнерын үүсгэн байгуулагч, командлагч нар осолдсон онгоцонд биечлэн байсан эсэх, тухайлбал Пригожин, Уткин нар хоёулаа тэднийг орлох "ихэрүүдтэй" байсантай холбоотойгоор бүрэн баталгаагүй хэвээр байна.
Эх сурвалж: ВВС news