ОХУ-ын Аюулгүй байдлын албаны "Шонхорууд" армийн удирдлагыг сольж, байлдааны цагийн байдал зарлаж, бүх нийтийн дайчилгааг эхлүүлэхийг Ерөнхийлөгч Владимир Путинд санал болгож байгаа гэж нөхцөл байдлын талаар сайн мэдэх эх сурвалжаас иш татан Bloomberg мэдээлэв.
Украин дахь фронтод илүү шийдэмгий ажиллагаа явуулж, Батлан хамгаалахын сайд Сергей Шойгуг огцруулахыг санал болгож байна. Түүнчлэн тусгай албаны хэд хэдэн төлөөлөгчид Жанжин штабын дарга Валерий Герасимовыг огцруулах Вагнер-ын тэргүүн Евгений Пригожинийн шаардлагыг дэмжиж байна гэж Bloomberg мэдээлэв.
Өнгөрсөн жил хавсаргасан нутаг дэвсгэрээ хадгалж үлдээхийн тулд Оросын армид шинэ хүч хэрэгтэй байна. Америкийн тагнуулын мэдээгээр Оросын цэргүүд дангаараа 120 мянган хүн хүчээ дайнд алдсан бол шархадсан хүмүүсийг тооцвол 300 мянгад хүрчээ.
Өнгөрсөн намар дайчлагдсан цэрэг офицерууд хүрэлцэхгүй болжээ. Наймдугаар сард Оросын арми үндсэндээ нөөцгүй болсон бололтой. Энэ нь командлал фронтын шугамын дагуу хүчээ "зай бөглөх" төдийгөөр байршуулж байгаа нь нотлогдсон гэж Дайн судлалын хүрээлэнгийн шинжээчид бичжээ. Украины сөрөг довтолгоо нь газар нутгаа чөлөөлөхөд төдийлөн амжилт олоогүй ч Оросын хүчнийг туйлдуулж, доройтуулсан гэж ISW онцолжээ.
Дайчилгааны ажиллагаа нь дайныг дэмжих олон нийтийн дэмжлэгийг бууруулж, Путины нэр хүндэд сөргөөр нөлөөлж байгааг харгалзан Кремль энэ шийдвэрээ хойшлуулсаар байгаа юм. Гуравдугаар сарын сүүлчээр бүс нутгуудад гэрээт цэрэг, сайн дурынхныг армид олноор элсүүлж нийтдээ 400 мянган хүнийг хамруулах даалгавар өгсөн. Гэвч дөрвөн сарын хугацаанд энэ төлөвлөгөөний биелэлт талаас хэтэрсэнгүй. Наймдугаар сарын эхээр Аюулгүйн зөвлөлийн орлогч дарга Дмитрий Медведев “Нийтдээ 231 мянга гаруй хүнийг энэ гэрээнд хамруулсан” гэж мэдэгдсэн.
Бүх нийтийн цэрэг татлагын хууль аль хэдийн бэлэн болсон. Дөрөвдүгээр сард цахим зарлан дуудахын тухай хууль батлагдаж, зөвхөн төрийн албаар дамжуулан мэдэгдэл илгээх замаар гадагш гарахыг хориглосон хууль, зургадугаар сард цэрэгт татагдах насыг 30 хүртэл сунгах хууль батлагдсанаар хугацаат цэргийн алба хаагчдын тоог 2.3 сая хүнээр нэмэгдүүлэх боломжтой болсон.
Думын батлан хамгаалах хорооны дарга Андрей Картаполов 7-р сард "Томоохон хэмжээний дайн, бүх нийтийн дайчилгааны зорилгоор хууль гаргасан. Гэвч одоо энэ том дайны үнэр аль хэдийн үнэртэж байна" гэж хэлж байв.
Эх сурвалж: Moscowtimes.ru