Дональд Трампыг сонгуулийн дүнд хөндлөнгөөс оролцсон гэх хэргийг шалгаж буй АНУ-ын Жоржиа мужийн шүүгч экс ерөнхийлөгчийг 200 мянган ам.долларын барьцаагаар батлан даалтад үлдээх шийдвэр гаргав. Гэхдээ энэ нь тэрбумтны хувьд дэндүү өчүүхэн төдий юм.
Батлан даалтад гаргах шийдвэрээр Дональд Трамп гэрч болон хамсаатнуудыг нь заналхийлэхийг оролдоогүй тохиолдолд шүүх хурал болтол эрх чөлөөтэй байх юм.
Прокурор Фани Уиллис Трампыг Жоржиа мужийн Бүгд найрамдах намын улстөрчдийг сонгуулийн луйврын хэрэгт уруу татах гэж оролдсон гэж буруутгаж байгаа юм. Дашрамд тодотоход Фанни Уиллис Ардчилсан намыг төлөөлдөг бөгөөд АНУ-ын дүүргийн прокурор бол сонгогдсон улс төрийн албан тушаал юм.
Даваа гарагт Дональд Трамп өөрийн нийгмийн сүлжээ болох Truth хуудсандаа Бүгд найрамдах намын Брайан Кемпийг дэмжсэн Жоржиа мужийн амбан захирагчийн талаар бухимдсан мэдэгдэл нийтэлжээ. Хавтаст хэрэгт дурдсанаар, 2020 оны арванхоёрдугаар сард сонгуулийн дараа Трамп Брайан Кемп болон төрийн бусад өндөр албан тушаалтнууд руу утасдаж, сонгуулийн үр дүнг түүний талд хянан үзэхийг шаардсан боловч тэд татгалзсан гэж дурджээ.
Шүүхийн батлан даалтад гаргах шийдвэрийн дагуу Трамп энэ хэргийн бусад шүүгдэгчидтэй зөвхөн өмгөөлөгчдийг байлцуулан холбогдох боломжтой.
Трампын эсрэг хэргийг удирдаж буй Фултон дүүргийн прокурор Фанни Уиллис экс ерөнхийлөгчийн албан ёсны яллах дүгнэлтийг есдүгээр сарын 5-нд товлон, шүүх хурлыг ирэх гуравдугаар сард эхлүүлэхийг шүүхээс хүссэн.
Энэ тухайгаа Трамп "Та төсөөлөөд үз дээ! Пүрэв гарагт би Жоржиа муж улсын Атлантад зүүн жигүүрийн прокурор Фанни Уиллист баривчлагдах гэж байна" гэж олон нийтийн сүлжээндээ бичжээ.
Үүнээс гадна Дональд Трампын эсрэг өөр гурван хэрэг үүсгэсэн бөгөөд тэрээр АНУ-ын одоогийн болон хуучин ерөнхийлөгч нарын дундаас анхны эрүүгийн яллагдагч болж байна.
Дональд Трамп энэ бүх буруутгалыг няцааж, Ардчилсан намын гишүүд, дэмжигчид улс төрийн өрсөлдөгчөө хавчиж байгаа "шуламны ан" гэж нэрлэж байгаа юм.
Өдгөө 77 настай Трамп ирэх онд дахин ерөнхийлөгчийн сонгуульд өрсөлдөхөөр болж, Бүгд найрамдах намаас нэр дэвшигчдийг тэргүүлж байна.
Эх сурвалж: ВВС