Луна-25-ыг Восточный сансрын буудлаас Союз пуужингаар хөөргөж байгаа нь
ОХУ-ын сар руу хөөргөсөн сансрын "Луна-25" автомат станц тооцоолсноос өөр тойрог замд орж, сарны гадаргуутай мөргөлдөж сүйрсэн байна. Энэ нь Зөвлөлтийн дараах үеийн түүхэн дэх анхны ийм тохиолдол болов.
Роскосмосын мэдээлснээр, 8-р сарын 19-нд "Луна-25" станцад нислэгийн хөтөлбөрийн дагуу төхөөрөмжийн буухын өмнөх эллипс буюу зууван тойрог замыг бий болгох импульс команд өгсөн. Гэсэн хэдий ч Москвагийн цагаар 14:57 орчимд "Луна-25"-тай холбоо тасарчээ.
Наймдугаар сарын 19, 20-ны өдрүүдэд уг төхөөрөмжийг хайж, холбоо тогтоохыг оролдсон ч үр дүнд хүрээгүй байна.
Орос улс саран дээр төхөөрөмж буулгахаар бэлтгэж байсан ч онцгой байдал үүссэн гэж холбогдох албадуудаас мэдээлжээ.
"Урьдчилсан шинжилгээний үр дүнгээс харахад импульсийн бодит параметрүүд тооцоолсон үзүүлэлтээс хазайсны улмаас "Луна-25" сансрын хөлөг тооцсоноос гадуур тойрог замд шилжиж, сарны гадаргууг мөргөсний улмаас сүйрсэн" гэж тайланд дурджээ.
Үүнтэй холбоотойгоор сансрын хөлгийн сүйрсэн шалтгааныг тогтоох асуудлыг тусгайлан байгуулагдсан салбар хоорондын комисс шийдвэрлэх юм байна.
Оросын орчин үеийн түүхэн дэх сарны анхны нислэг 8-р сарын 11-нд эхэлсэн бөгөөд гариг хоорондын автомат "Луна-25" станцыг Восточный сансрын буудлаас хөөргөсөн юм.
"Роскосмос"-ын ерөнхий захирал Юрий Борисовын хэлснээр "Луна-25"-ын зөөлөн газардах ажиллагаа наймдугаар сарын 21-нд болох ёстой байв.
"Луна-25" нь сар, сарны орон зайг судлах, практикт ашиглах Оросын сарны хөтөлбөрийн нэг хэсэг юм. Нислэгийн гол зорилго нь тийм ч их амбицтай байгаагүй. Сар руу нисэх, тэнд зөөлөн газардах, дараа нь нэг жил ажиллах.
Нэмж дурдахад тус станц нь шинжлэх ухааны хэд хэдэн туршилт, ялангуяа ус байгаа эсэхийг тодорхойлох шаардлагатай байсан ч хамгийн чухал нь ирээдүйд бусад станцуудыг буухад бэлтгэх нь гол ажил байв.
Эх сурвалж: ВВС news