Украины дайнд Хятадын цэргийн хуягт техникийг ашиглах магадлал нэмэгдсээр байна. Тодруулбал ОХУ-ын ерөнхийлөгч Владимир Путины хамгийн ойрын туслахуудын нэг гэгддэг Чеченийн Бүгд Найрамдах Улсын тэргүүн өдгөө 47 настай Рамзан Кадыровын Украин дахь байлдааны талбарт ашиглахаар авсан цэргийн шинэ машин техникүүд дунд Хятадын төрийн өмчит компанид үйлдвэрлэсэн хуягт машин байгаа нь олгы анхаарлыг татжээ.
Кадыров орон нутгийн цагаар 7-ны өдөр Телеграм хуудсаараа дамжуулан "Цэргийн тусгай ажиллагаанд оролцож буй Чеченийн ангиудыг материал, техникээр хангах асуудал бол бидний нэн тэргүүний зорилтуудын нэг юм. Үүнтэй холбогдуулан өнгөрөгч 6-ны өдөр шинээр худалдаж авсан хуягт машин, пикап зэрэг цэргийн зориулалттай автомашинуудын чанар, үйл ажиллагааг шалгасан” хэмээн онцлон тэмдэглэсэн байна. Үүний зэрэгцээ эдгээр техник хэрэгслүүдийг шалгаж буй бичлэгийг цуг нийтэлжээ.
Батлан хамгаалахын салбарын мэдээ мэдээллээр дагнан ажилладаг Defence Blog-ын онцолсноор “Кадыровын танилцуулсан цэргийн зориулалттай техникүүд дунд Хятадын батлан хамгаалахын Shanxi Baoji Special Vehicles компанийн үйлдвэрлэсэн хуягт техник болох “Tiger” багтсан” болохыг цохон тэмдэглэв. Ингэснээр ОХУ-ын арми Хятадад үйлдвэрлэсэн хуягт техникийг анх удаа хүлээн авснаа баталж буй хэрэг болсон юм.
Энэхүү хуягт техникийг Хятадаар “Хуси” гэдэг ба Defence Blog-ын мэдээлснээр уг техник нь 9 хүртэл явган цэрэг тээвэрлэх боломжтойн дээр зэвсэг тээвэрлэх, эргүүл хийх, анхны тусламж үзүүлэх зэрэг янз бүрийн зориулалтаар өөрчилж, ашиглах боломжтой аж. 2012 онд Францад болсон батлан хамгаалах салбарын олон улсын Eurosatory үзэсгэлэнд нээлтээ хийсний дараа Багамын арлууд, Боливи, Сомали, Тажикистан зэрэг янз бүрийн орны зэвсэгт хүчин экспортлон авч байв.
Кадыров нь Украинд болж буй дайнд Чеченийн армийг татан оролцуулах төлөвлөгөөнийхөө талаар байнга дурссаар ирсэн юм. Тэрээр өнгөрсөн сарын 30-нд Teлеграм хуудсаараа дамжуулан "Чеченийн тал цэрэг оруулах даалгавар авсан. Хариуцах бүс нь Бүгд Найрамдах Донецк улс байх болно” хэмээн мэдэгджээ. Түүний хэлснээр, "Ахмат" батальоны бусад гишүүд, түүний удирддаг Чеченийн тусгай хүчнийхэн Запорожье болон Херсон дахь Украины армитай “нэгийгээ үзэх” гэнэ. ОХУ-ын Батлан хамгаалах яам мөн өдөр Чеченийн цэргүүд Орос цэргүүдийн хамт Украины байлдааны талбарт хамтран зүтгэсэн хэмээн дурджээ. Тодруулбал өнгөрөгч 5-ны өдөр Оросын эх газар, тэр дундаа нийслэл Москва хоттой хил залгаа оршдог Белгород мужид нисгэгчгүй нисэх төхөөрөмжөөр томоохон хэмжээний халдлага үйлдсэний дараа Кадыров мөн Чеченийн цэргүүдийг Белгород руу олноор нь илгээх саналыг өөрөө гаргасан байна.
Хэрэв Кадыровын авсан Хятадад үйлдвэрлэсэн хуягт техникүүдийг Украины байлдааны талбарт ашиглах нь үнэн бол Хятадад үйлдвэрлэсэн цэргийн зориулалт бүхий хүнд техникийг уг дайнд анх удаа ашиглаж буй явдал болох юм. Одоогийн байдлаар Хятадын нисгэгчгүй онгоц, хагас дамжуулагч зэрэг иргэний болон цэргийн зориулалтаар ашиглах боломжтой технологийг Оросын армид нийлүүлж, цаашлаад тэдгээр технологийг Украины дайнд ашиглаж буй нь батлагдаад байгаа ч хүнд техник нийлүүлсэн гэх баримт өнөөг хэр нь олдоогүй байсан билээ.
Хэрэв Хятад Орост зэвсэг нийлүүлсэн тохиолдолд бидний тавьсан "улаан шугам"-ыг давсан хэрэг болно хэмээн АНУ хатуу хориг арга хэмжээ авахаа сануулсан байна. Өнгөрсөн сарын 19-нд Японы Хирошима хотноо зохион байгуулагдсан “Их 7”-гийн бүлгийн дээд хэмжээний уулзалтын үеэр АНУ тэргүүтэй эдийн засгийн хэмжээгээрээ тэргүүлэгч долоон орны удирдагчид “Бид гуравдагч орнууд Орост зэвсэг нийлүүлж байгааг зогсоож, үүнд хариу арга хэмжээ авах хамтын ажиллагаагаа бэхжүүлнэ. Үгүй бол бид ноцтой нөхцөл байдалтай тулгарах болно“ хэмээн байр сууриа илэрхийлж байсан юм.
Гэвч Хятад улс Оросын армид зэвсэг, техник нийлүүлэх тухайгаа албан ёсоор мэдэгдээгүй ба Кадыровын худалдаж авсан хуягт техникүүд Хятадаас шууд экспортлогдсон уу, эсвэл гуравдагч орноор дайрсан эсэх нь хараахан тодорхой болоогүй байгаа юм.
Эх сурвалж: JoongAng
