Адольф Гитлерийн төрсөн байшин
Австрийн Браунау-ам-Инн хот дахь Адольф Гитлерийн төрсөн байшинд хүний эрхийн чиглэлээр цагдаа нарт зориулсан ахисан түвшний сургалт зохион байгуулах гэж байна.
Адольф Гитлер 1889 онд энэ хуучин байшингийн гуравдугаар давхрын түрээсийн өрөөнд төрж, тэнд нялх байхдаа хэдэн сарыг өнгөрөөжээ. Гэсэн хэдий ч нацизмыг ялснаас хойш бараг 80 жилийн дараа ч гэсэн энэ байшин олны анхаарал татсан хэвээр, зөрчилдөөн, хэлэлцүүлгийн объект болсоор байна.
Австрийн Засгийн газар 2016 онд удаан хугацааны турш үргэлжилсэн маргааны эцэст уг байшинг эзнээс нь хүчээр худалдаж авсан бөгөөд засч тохижуулан ирэх намраас цагдаагийн албан хаагчдыг сургах курсуудыг тэнд нээхээр төлөвлөж байна.
Гэсэн хэдий ч олон австричууд уг байшинг неонацистуудын мөргөлийн газар болгохгүйн тулд буулгаж нураахыг шаарддаг бөгөөд энэ шаардлагыг 2016 онд тусгайлан байгуулагдсан шинжээчдийн комисс дэмжсэн юм.
Мөн зарим нь 2016 онд байшинд дүрвэгсдийг хүлээн авах төв байгуулахыг дэмжсэн юм. Тэр бол Ойрхи Дорнодоос, ялангуяа Сириэс дүрвэгсдийн томоохон давалгаа ирж байсан үе байв.
Олон нийтийн зарим хэсэг нь Австри улсыг нацизмаас чөлөөлсөн музей болгохыг хүсч, байшинг нураах нь тус улсын түүхийг засварласан явдал болно гэж мэдэгджээ.
Мөн зарим иргэдийн зүгээс 17-р зууны байшинг нураахыг зүгээр л эсэргүүцсэн бөгөөд учир нь энэ нь хуучин Браунау-ам-Инн хотын нэг хэсэг юм гэхчлэн олон нийтийн янз бүрийн санаа бодлыг уралдуулсаар ирсэн юм.
Эцэст нь Дотоод хэргийн яам тэнд сургалт явуулахаар шийдсэн бөгөөд энэ зориулалтаар хийх өөрчлөлтийг 2025 он гэхэд дуусгана гэж үзжээ.
Нацистын жилүүдэд Австрийн баруун хойд хэсэгт, Германтай хиллэдэг хотод байдаг энэ байшинг Гитлерийн мөргөлийн газар болгож, олон жуулчдыг татдаг байжээ.
Дараа нь дайны дараа Австрийн засгийн газар хэдэн арван жилийн турш энэ байшинг эзэн Герлинде Поммерээс түрээслэсэн байна. Тэрээр энэ байшинг нацистын дэглэмийн өндөр албан тушаалтнаас дайны дараа шууд худалдаж авсан ээжээсээ өвлөн авсан юм.
Гэсэн хэдий ч байрны эзэн Герлинде Поммер өөрчлөн засвар хийх төлөвлөгөөг эсэргүүцэж, түрээсийн гэрээгээ зогсоов.
Таван жил маргалдсаны эцэст Австрийн эрх баригчид хууль баталж, уг байшинг хүчээр 800 мянган еврогоор худалдаж авсан байна. Поммер энэ асуудлаар шүүхэд хандсан бөгөөд гурван жилийн дараа шүүхээс түүнд 1.5 сая евро төлөх шийдвэр гаргажээ.
Байшингийн урд талд "Энх тайван, эрх чөлөө, ардчиллын төлөө. Фашизм давтагдах ёсгүй. Үүнийг олон сая үхэгсэд сэрэмжлүүлж байна" гэсэн бичээстэй нацистын Маутхаузен хорих лагерийн карьерын чулууг байршуулсан байна.
Эх сурвалж: ВВС