Даваа гарагт Фейсбүүкийн толгой компани Мета хэрэглэгчдийн мэдээллийг АНУ, Европын хооронд дамжуулахдаа алдаа гаргасан хэргээр 1 тэрбум еврогийн торгууль төлөх болжээ.
Торгуулийг Ирландын Мэдээллийг Хамгаалах Комиссоос ногдуулсан бөгөөд Европын Холбооны Мэдээллийг Хамгаалах Ерөнхий Журмын хувь хүний нууцын тухай хуулийн хүрээнд ногдуулсан хамгийн өндөр дүнтэй торгууль болсон байна.
Харин торгуулийн тухай шийдвэртэй танилцсан Мета компанийн зүгээс шийдвэрийг үндэслэлгүй хэмээн үзэж байгаагаа мэдэгдэж, давж заалдана гэсэн юм.
Үйл явдлын хүрээнд Фейсбүүкийн ерөнхийлөгч Ник Клеггийн хэлснээр, “Бидний хувьд Европ тивд үйлчилгээ үзүүлдэг олон мянган компанийн нэгэн адилаар яг адилхан хуулийн механизмыг дагаж мөрдсөнөөрөө ганцаар торгуулж буй явдалд харамсаж байна.
Тэдний гаргасан шийдвэр алдаатай хийгээд ор үндэслэлгүй. Энэхүү шийдвэрийг гаргаснаар тэд Европоос АНУ руу мэдээлэл дамжуулж буй бусад бүх компанийн хувьд аюултай жишиг тогтоож байна” гэжээ.
Эх сурвалж: BBC