Хятад улс сүүлийн найман сарын хугацаанд анх удаа АНУ-ын төрийн сангийн бондуудаас нэмж худалдан авчээ. Хэдийгээр ам.долларын ноёрхол суларч, АНУ-ын холбооны засгийн газар дефолт зарлах магадлалтай байгаагийн дээр тус улсын жижиг дунд банкнуудын үйл ажиллагаа доголдосноор зээл хумигдаж, олон улсын эдийн засагт хямрал нүүрлэх магадлал өнөөг хэр нь өндөр байгаа зэрэгтэй холбоотойгоор найдвартай активыг илүүд үзэж буйгаас болж буй бололтой.
АНУ-ын Сангийн яамны 21-ний өдрийн тоо баримтаас үзвэл, өнгөрөгч 3-р сарын эцсийн байдлаар Хятад улс сүүлийн 8 сарын хугацаанд анх удаа Америкийн төрийн сангийн бондын хэмжээг нэмэгдүүлсэн болохыг онцлов. Тодруулбал өнгөрөгч 3-р сарын байдлаар, Хятадын эзэмшиж буй АНУ-ын төрийн сангийн бонд 869.3 тэрбум ам.долларт хүрсэн нь өмнөх сарынхаас 20.5 тэрбум ам.доллараар нэмэгдсэн үзүүлэлт болжээ. Энэ нь өнгөрсөн оны мөн сард 1.132 их наяд ам.доллараас бага байсан уг хэмжээ 8 сарын хугацаанд анх нэмэгдсэн нь энэ юм. Хятад улс өнгөрсөн оны 7-р сараас хойш АНУ-ын Төрийн сангийн бондын хэмжээг бууруулж байсан юм.
Энэ нь өнгөрөгч 3-р сард Silicon Valley банк дампуурснаас хойш банкны салбарт эмх замбараагүй байдал газар авснаас гадна АНУ бодлогын хүүгээ 0.25 нэгж хувиар өсгөснөөр 5 хувьд хүрч эдийн засгийн хямралд өртөх вий гэсэн болгоомжлол улам бүр нэмэгдэж байсан үетэй давхцаж байгаа нь анхаарал татаж байна. Тухайлбал, АНУ-ын 10 жилийн хугацаатай төрийн сангийн өгөөж өнгөрсөн оны аравдугаар сард 4.338 хувьд хүрсэн нь сүүлийн 15 сарын хамгийн өндөр үзүүлэлт болсон бол өнгөрөгч 3-р сарын эхээр 3.996 хувь байснаа мөн сарын эцэст 3.49 хувь болж буурчээ. Энэ нь тухайн үед найдвартай хөрөнгийг илүүд үзэж байсантай холбоотой.
TD Securities-ийн хүүгийн ахлах стратегич Геннадий Голдберг "Өнгөрөгч 3-р сард банкны салбар дахь хямралын улмаас хөрөнгө оруулагчид эрсдэлтэй хөрөнгө оруулалт хийхээс аль болох зайлсхийж эхэлсэн. Япон, Хятад улсууд АНУ-ын нэлээд олон үнэт цаасыг худалдаж авсан бөгөөд Их Британи эсвэл Англиар дамжуулан хөрөнгө оруулалтын сангийн бондуудаас худалдаж авсан нь ихээхэн сонирхол татаж байна” хэмээн цохон тэмдэглэв.
АНУ-ын Засгийн газрын хамгийн их бондыг эзэмшдэг Япон улс өнгөрсөн 2-р сарын байдлаар 1,818 их наяд ам.долларын бонд эзэмшиж байсан бол 3-р сард 5,9 тэрбум ам.долларын бонд нэмж худалдаж авснаар 1,877 их наяд ам.долларт хүрчээ. Түүнчлэн мөн хугацаанд Их Британи АНУ-ын төрийн сангийн эзэмшиж байсан хөрөнгөө 643 тэрбум ам.доллараас 714 тэрбум ам.доллар болгон нэмэгдүүлжээ. БНСУ-ын хувьд АНУ-ын төрийн сангийн эзэмшлийн хэмжээ өнгөрөгч 3-р сарын байдлаар өнгөрсөн сарынхаас 3.2 тэрбум ам.доллараар нэмэгдэж 114 тэрбум ам.долларт хүрсэн байна.
Хэдийгээр АНУ-ын Төрийн сангийн бондыг найдвартай хөрөнгө гэж үздэг ч АНУ-ын өрийн таазны асуудлаас болж хүүгээ хугацаанд нь төлж чадахгүй дефолт зарлах эрсдэл өндөр байгаа энэ үед Хятад улсад ашигтай байх магадлалтай байгаа юм. Петерсоны нэрэмжит Олон улсын эдийн засгийн хүрээлэнгийн судлаач Маркус Норланд “Хэрэв АНУ дефолт зарлахад хүрвэл дэлхийн санхүүгийн зах зээлд “түймэр” гарч болзошгүй. Олон улсын худалдааны гол валют болох ам.долларын хамтаар АНУ-ын байр суурь ч суларч магадгүй юм” хэмээн анхааруулав.
Эх сурвалж: Maei