“Говийн зөөлөн алт”, “Элсэнд ургадаг орхоодой”, “Цөлийн аргамжин цэцэг”хэмээгдсэн цагаан гоёо нь ӨМ-ын Алшаа аймгийн малчдын орлогын гол эх үүсвэр болж байна. Цагаан гоёо нь эмчилгээний чанар өндөр, үнэт ховор ургамал юм. ӨМ-ын Алшаа аймагт цагаан гоёо их ургадаг. Жил болгоны хавар, намрын улиралд нутгийн малчид гоёоны “ан”-д гарцгаана. Харин сүүлийн жилүүдэд малчид ашиг орлогоо нэмэгдүүлэхийн тулд өөрийн бэлчээр нутагтаа цагаан гоёо тарих болжээ. Цагаан гоёо тариалсанаар ашиг олоод зогсохгүй элсийг тогтворгүйжүүлж, салхи шуурга ч зохих хэмжээнд буурч байгаа юм. Байгалийн зэрлэг гоёоны үрийг бургас, заг дэрлүүлэн тарьдаг. Хур бороо ихтэй жилд усалж тордох шаардлагагүй, гантай жилд 1-2 удаа услаад л хураалт авдаг.
Цагаан гоёо жил өнжиж ургадаг, хавар нь тарьсан гоёогоо хойтон жилийнх нь хавар, намар малтаж авна. Гоёогоо малтахдаа үндсийг нь үлдээх тул ирэх хавар нь мөн ургадаг. Алшаа аймгийн Эзнээ хошууны малчин Туяа цагаан гоёо тарьж буй тухайгаа ярихдаа "Цагаан гоёо газар их голдог. Элсэрхэг, бургас, заг ихтэй газарт сайн ургадаг. Ер нь үрээ бургас, заг дэрлүүлж тарихгүй бол ургахгүй. Бургас загийн үндэснээс тэжээлээ авдаг учраас тэр. Ер нь ургацын өгөөж муутай, сайндаа 60 хувь, дунджаар 40-50 хувьтай ургадаг.
Манайх өнгөрсөн хавар 10 мянга гаруй суулгац тарьсан. Энэ жилийн хавар, намартаа 5000 ширхэг орчим гоёо авах байх. Бид малаа маллахын хажуугаар гоёо тарьж байгаа. Манайхны зарим айл тусгайлан цагаан гоёо тарьдаг болсон. Нутагтаа эхлээд бургас, заг ихээр тарьсан. Одоо жилдээ хэдэн арван мянган гоёо тарьдаг болсон гэлээ. Цагаан гоёоны үнэ жил болгон өөр байдаг ч ерөнхийдөө 20-40 юанийн хооронд байдаг. Гэхдээ нэг метрээс урт, том гоёо тусдаа үнэтэй байдаг ч таримал гоёо метрээс давах ер нь ховор, зэрлэг гоёо харин хоёр метр хиртэй ургах нь буй. Тийм том гоёо дунджаар 6000 мянган юань, бүр онцгой зарим нь хэдэн арван мянган юаниар зарагддаг аж. Цагаан гоёо тарьж ургуулж буй айлууд жилд дунджаар 100 мянган юанийн ашиг орлого олдог юм байна. Мөн сүүлийн жилүүдэд улаан гоёо ч үнэд хүрч, Алшаа аймгийн Зүүн,Баруун хошууны малчид улаан гоёо тарьж эхэлж байгаа гэнэ.
