Оросын ерөнхий сайд Михаил Мишустин ирэх 7 хоногт Хятадад албан ёсны айлчлал хийхээр болсон байна. Мишустин Бээжинд хятадын төрийн өндөрлөгүүдтэй уулзалт хэлэлцээ хийх юм байна. Шанхайд болох Орос-Хятадын бизнес форумд оролцох төлөөлөгчдийг тэргүүлэх юм байна.
Оросын Ерөнхий сайд Михаил Мишустин Хятадын Төрийн зөвлөлийн Ерөнхий сайд Ли Чаны урилгаар ирэх 23, 24-ний өдрүүдэд Хятадад албан ёсны айлчлал хийхээр болсон гэдгийг Хятадын гадаад яамны төлөөлөгч Ван Вэнбинь өмнө нь мэдээлсэн юм. Оросын засгийн газрын хэвлэлийн албанаас мэдээлснээр, Мишустин Бээжин хотноо Хятад улсын дарга Ши Жиньпинтэй уулзаж, Төрийн зөвлөлийн Ерөнхий сайд Ли Чантай хэлэлцээ хийх юм байна. Орос-Хятадын худалдаа-эдийн засгийн салбар дахь хамтын ажиллагааны тулгамдсан асуудлуудыг хэлэлцэж, аж үйлдвэр, эрчим хүч, тээврийн дэд бүтэц болон ХАА, бусад салбар дахь харилцаа хамтын ажиллагаанд онцгой анхаарал хандуулах юм байна. Хэлэлцээний төгсгөлд хоёр тал хооронд нэлээд хэдэн баримт бичигт гарын үсэг зурахаар төлөвлөж байгааг Оросын ЗГ-ийн хэвлэлийн албаны мэдээлэлд дурьдсан байна. Мишустин мөн Шанхайд очиж, Орос-Хятадын бизнес форумд үг хэлэх төлөвлөгөөтэй байна. Оросын Ерөнхий сайдын орлогч Александр Новак, “Сбербанк”-ны захирал Герман Греф, “Ростелеком”-ын Михаил Осеевски зэрэг оросын төр бизнесийн өндөр албаныхан, мөн Хятадын тэргүүлэх компаниудын удирдлагууд энэ арга хэмжээнд оролцох юм байна. Мишустины хувьд, анх удаа Оросын Засгийн газрын даргын хувиар Хятадад айлчлах гэж байгаа нь энэ юм байна. Хятадын дарга Ши Жиньпин өнгөрөгч 3-р сард Москвад айлчлах үеэрээ, Оросын засгийн газрын тэргүүнийг Хятадын шинээр томилогдсон Төрийн Зөвлөлийн Ерөнхий сайдтай ойр нягт холбоо хэлхээ тогтоох үүднээс Хятадад айлчлахыг урьж, Мишустин урилгыг хүлээн авчээ.
Шанхай дахь Орос-Хятадын бизнес форум нь, Украинд халдан довтолсных нь дараагаас Өрнөдийн орнууд Оросыг дэлхийн зах зээлээс тусгаарлаж, нийлүүлэлтийн гол сүлжээдийг нь таслах хоригууд тогтоогоод байгаа үед Бээжингийн Москвад үзүүлж байгаа дэмжлэгийг тодотгож байна гэж өрнөдийн хэвлэлүүд бичиж байна. “Файнэншл таймс”-т мэдээлснээр, энэ форумын үеэр ХАА, тээвэр, эрчим хүч, аж үйлдвэр, технологийн гээд төрөл бүрийн салбарт Орос-Хятадын эдийн засгийн хамтын ажиллагааг өргөжүүлэх төлөвлөгөө энэ бизнес форумын хөтөлбөрт багтжээ. Өнгөрсөн онд Орос, Хятадын худалдааны хэмжээ 190 тэрбум ам.долларт хүрч, шинэ дээд үзүүлэлтэд хүрсэн. Энэ онд 200 тэрбумд хүргэж ахиулах тооцоотой байгаагаа албаныхан мэдэгдэж байгаа юм.