Орон нутгийн цагаар 19-ний өдөр Японы Хирошима хотноо нээлтээ хийсэн “Их 7"-ын дээд хэмжээний уулзалтын үеэр удирдагчид “Оросын батлан хамгаалах салбарт дэмжлэг туслалцаа үзүүлэх боломжтой бүхий л үйлдвэр, үйлчилгээнд нэмэлт хориг арга хэмжээ авснаар бид ОХУ-ыг хүндхэн байдалд оруулах болно” хэмээн мэдэгдэж тус улсын эсрэг авч хэрэгжүүлж буй хориг арга хэмжээгээ улам чангатгахаар болсноо мэдэгдэв.
Мөн өдөр хийсэн хамтарсан мэдэгдэлдээ "Их 7"-ын удирдагчид "ОХУ-ын Украины эсрэг өдүүлж буй хууль бус, үндэслэлгүй дайныг буруушааж байгаагийн дээр Украины нутаг дэвсгэрээс цэргээ нэн даруй, ямар ч болзолгүйгээр гаргахыг Орост уриалж байна” хэмээн онцлон тэмдэглэв. "Бид ОХУ-ын дайн хийх чадварыг алдагдуулах хориг арга хэмжээ авахад нэгдмэл байр суурьтай байх болно. ОХУ-ын цэргийн төслүүдэд дэмжлэг үзүүлж болзошгүй гишүүн орнуудын технологи, үйлдвэрлэлийн тоног төхөөрөмж, үйлчилгээнээс тус улсыг холдуулах болно” хэмээн дурдсан байна.
Үүний тулд тулалдааны талбарт ашиглагдаж болох технологи, үйлчилгээний салбарын хориг арга хэмжээг өргөжүүлэхийн зэрэгцээ үйлдвэрлэл, барилга, тээвэр зэрэг чухал салбарт хамтран ажилладаг хувь хүн, байгууллагуудыг чиглэсэн хориг арга хэмжээг чангатгахаар төлөвлөж байгаа аж. Зэвсгийн үйлдвэрлэлтэй шууд холбоогүй ч хоёрдогч байдлаар Оросуудын зэвсгийн үйлдвэрлэлдээ ашиглаж болох эд анги, бараа бүтээгдэхүүний худалдааг хааж боомилох талаар ийнхүү дахин мэдэгдэв. Түүнчлэн тус мэдэгдэлд “Оросын түүхий газрын тос болон боловсруулсан газрын тосны бүтээгдэхүүний үнийн дээд хязгаарыг хэвээр хадгална” гэж тусгажээ.
Удирдагчид мөн Хятад, Иран улсуудыг онцгойлон дурдаад ОХУ-ын өдүүлсэн энэхүү дайныг зориудаар санхүүжүүлж буй гуравдагч орнуудын эсрэг хориг арга хэмжээ авахаа ч анхааруулав. Тухайлбал “Бид гуравдагч орнууд дахь Оросын банкуудын салбарыг хориг арга хэмжээнээс зайлсхийх хэрэгсэл болгохоос урьдчилан сэргийлэх болно" хэмээн онцлон тэмдэглэв. Мөн тус мэдэгдэлд улс орнуудын битүүмжилсэн Оросын хөрөнгийг Украины сэргээн босголтыг санхүүжүүлэхэд ашиглах боломжийн талаар ч дурдсан байна. Удирдагчид мөн ерөнхийлөгч Владимир Путины тактикийн цөмийн зэвсгийг байршуулах тухай хэлсэн үгийг шүүмжилж, "Оросын талын ямар ч хариуцлагагүйгээр хийж буй цөмийн аюул заналхийлэл хийгээд Беларусьт цөмийн зэвсгийг байрлуулах санаархалыг хэрхэвч хүлээн зөвшөөрч болохгүй” хэмээн цохон тэмдэглэжээ.
Үүнтэй холбогдуулан Их Британийн засгийн газрын зүгээс мөн өдөр мэдэгдэхдээ энэ оныг дуустал Оросын алмаз, зэс, хөнгөн цагаан, никель импортлохыг хориглохоор болсноо хэвлэл мэдээллийн агентлагуудаар дамжуулан мэдэгдсэн байна. Тус улсын ерөнхий сайд Риши Сунак “Бид дэлхийн энх тайван, аюулгүй байдлын төлөө харгис хэрцгий хүчирхийлэл үйлдэгчидтэй хамтрахгүй гэдгээ харуулах ёстой” хэмээн өгүүлжээ.
Очир алмаз нь ОХУ-ын экспортын салбар ын нэгэн томоохон төлөөлөлд тооцогддог юм. 2021 оны байдлаар 4 тэрбум орчим ам.доллараар хэмжигдэх алмазыг хилийн чанадад экспортолсон байна. Европын Холбооны зөвлөлийн дарга Чарльз Мишель “Их 7”-гийн бүлгийн дээд хэмжээний уулзалтын өмнө зохион байгуулагдсан хэвлэлийн бага хурал дээр “ОХУ-ын алмаз мөнхийн зүйл биш” хэмээн өгүүлсэн юм.
Ройтерс агентлагийн мэдээлснээр, АНУ-ын засгийн газар ч Худалдааны яамны түвшинд хатуу хориг арга хэмжээ авахаар бэлтгэж байгаа гэв. Тус агентлагийн албаны хүнээс иш татан мэдээлснээр "Худалдааны яамны хар жагсаалтад Орос болон гуравдагч орны 70 орчим компанийг нэмж оруулахаас гадна уг дайнд ямар нэгэн байдлаар дэмжлэг үзүүлж буй 300 орчим хувь хүн болон байгууллагуудын эсрэг хориг арга хэмжээ авахаар бэлтгэж байна” хэмээн мэдээлсэн байна. Түүнчлэн “Олон улсын санхүүгийн системд Москвагийн нэвтрэх боломжийг хумихад анхаарах болно” гэдгээ дурджээ.
Эх сурвалж: JoongAng