Энэ он гарсаар дэлхийн зах зээл дэх элсэн чихрийн үнэ сар сараар өсч, 2011 оны аравдугаар сараас хойш буюу сүүлийн 11 жил 6 сарын хугацаан дахь дээд түвшиндээ хүрчээ.
НҮБ-ын Хүнс, хөдөө аж ахуйн байгууллагын 8-ны өдөр мэдээлснээр, энэ оны 4-р сард дэлхийн элсэн чихрийн үнийн индекс 149.4 болж өссөн нь өнгөрөгч 1-р сарынхтай харьцуулахад 27.9 хувиар нэмэгдсэн үзүүлэлт болсон талаар онцлов. Үнийн индекс гэдэг нь 2014-2016 оны дундаж үнийг 100 хэмээн хувилж харьцуулсан тоо юм.
Тодруулбал дэлхийн элсэн чихрийн үнийн индекс өнгөрөгч 1-р сард 116.8 байсан бол 2-р сард 125.2, 3-р сард 127.0, өнгөрсөн сард 149.4 болж өссөн байх юм. Ийнхүү элсэн чихрийн үнэ зогсолтгүй өсч байгаагийн шалтгаан бол Энэтхэг, Хятад зэрэг үйлдвэрлэгч бүс нутагт үйлдвэрлэл буурах төлөвтэй байгаатай холбоотой аж.
Нөгөөтэйгүүр Бразилийн чихрийн нишингийн үйлдвэрлэл сайн байх төлөвтэй байгаа ч хур тунадасны хэмжээ их байгаа нь ургац хураалтыг хойшлуулж байна. Түүнчлэн олон улсын зах зээл дэх түүхий газрын тосны үнэ өссөнөөс гадна Бразилийн мөнгөн тэмдэгт болох реалын ам.доллартай харьцах ханш чангарсан зэрэг нь элсэн чихрийн үнэд нөлөөлөх гол хүчин зүйлүүд болжээ.
Элсэн чихрийн үнэ удаан хугацаанд өссөн тохиолдолд тус бүтээгдэхүүнийг гол түүхий эдээ болгодог нарийн боов, амттан, зайрмаг, ундаа зэрэг бараа бүтээгдэхүүний үнэд нөлөөж “sugаrflation“ (sugar+inflation)-ыг үүсгэж болзошгүй хэмээн шинжээчид зовниж байна.
Өнгөрсөн онд Орос, Украины дайны улмаас дэлхийн зах зээлд улаан буудайн үнэ өссөний улмаас талх, гурилан бүтээгдэхүүний үнэ нэлээд хэмжээгээр өссөн билээ.
Эх сурвалж: Kyunghyang