Хөвсгөл аймгийн Ренчинлхүмбэ сумын хөдөөнөөс 2018 оны наймдугаар сард 13 настай охин М ор сураггүй алга болоод өнөөдрийг хүртэл олдоогүй билээ. Охиныг олохын тулд сум орон нутаг болон аймгийн онцгой байдлын хэлтсээс хүч нэмэгдүүлсэн баг олон хоног сар хайгаад ч олоогүй юм. Тэгвэл хэдхэн хоногийн өмнө цагдаагийн байгууллагаас охины цогцсыг олсон мөн сэжигтэн этгээдийг Өмнөговь аймгаас баривчилсан гэх мэдээллийг өгсөн билээ.
Тодруулбал, мөрдөн шалгах ажиллагааны явцад хохирогчийн амь насыг хөнөөсөн болохоо хүлээн зөвшөөрчээ. Сэжигтэн этгээд өмнө нь хүчиндэх гэмт хэрэгт 2 удаа ял шийтгэгдэж байсан 38 настай, эрэгтэй Б гэгч хохироосон байж болзошгүй нөхцөл байдал тогтоогдсон. Сэжигтэй этгээдийг эрэн сурвалжлах ажиллагааг зохион байгуулж, түүнийг Өмнөговь аймгийн Ханбогд сумын Цагаанхад гэх газраас олж тогтоон, таван жилийн өмнө хохирогчийн амь насыг хохироон хэргийн газраас 3 километр газарт зөөвөрлөн модон дунд нуусан байсныг илрүүлсэн байгаа юм.
Тэгвэл тухайн этгээд Ренчинлхүмбэ сумынх бөгөөд талийгаач охины ар гэрийнхэнтэй нь ойрын танил байжээ. Охины гэр орноор орж гардаг, ээж эмээ нартай нь мэнд устай явдаг нэгэн байжээ. Тухайн хэрэг явдал гарсны дараахан сэжигтэн этгээд гэрт нь ирээд "Хөөрхий минь хаачсан юм болоо, охин хүүхэд ингээд алга болчихдог хэн аваад явав" гэх мэтээр гэмээ нууж худлаа дүр эсгэж худлаа ярьж сууж байсан гэдгийг ар гэрийнхэн нь хэлж байна. Саатуулсан байгаа сэжигтэн этгээдэд ар гэрийнхэн нь гомдолтой байгаа аж. Сэжигтний ар гэрийнхнийг бүгдийг нь танина, айдастай байна гэжээ.
Ар гэрийнхэн нь сэжигтэн Б-г сайн таних юм байна. Гэтэл хонь хариулж байсан нялх охиныг нь хууран мэхэлж авч яваад амийг нь хөнөөж, цогцсыг нь нуусан байжээ.
