Олон Улсын сагсан бөмбөгийн холбоо (FIBA)-оос Ази тивийн аварга шалгаруулах 3х3 тэмцээнийг тав дахь удаагаа зохион байгуулах гэж байна. Энэ удаагийн тэмцээн Сингапурт болох ба ирэх зургаадугаар сарын 06-10-ны хооронд үргэлжлэх юм.
Одоогийн байдлаар уг тэмцээн нийт 53 улсын шигшээ баг /Эрэгтэй-30, Эмэгтэй-23/ оролцох бөгөөд Монгол Улсын эрэгтэй, эмэгтэй шигшээ баг шууд оролцох эрхээ авлаа.
Тодруулбал, Эмэгтэйчүүдийн ангиллын долоон баг шууд оролцох эрхээ авсан ба үүнд, зохион байгуулагч Сингапур, өмнөх аварга Австрали болон чансааг тэргүүлэгч Монгол, Хятад, Япон, Тайвань, Шри Ланка улсын багууд багтаж байна. Харин бусад 16 баг нь урьдчилсан шатны таван хэсэгт хуваагдаж тоглох юм.
Харин эрэгтэйчүүдийн ангилалд зөвхөн гурван баг Ази тивийн аваргад оролцох эрхээ шууд авсан дунд зохион байгуулагч Сингапур, өмнөх аварга Австрали, дэлхийн чансааг тэргүүлэгч Монгол Улсын шигшээ баг багтаж байгаа юм.
