Сангийн сайд Б.Жавхлан Засгийн газрын өнөөдрийн хуралдаанаар Монгол Улсын нэгдсэн төсвийн 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуулийн төслийг танилцуулсан талаараа мэдээлэл хийлээ.
Тэрбээр, "Бид жил бүр тавдугаар сарын 1-ний дотор ирэх оны төсвийн макро хүрээг Засгийн газарт танилцуулдаг. Энэ хүрээнд өнөөдөр 2024 оны төсвийн хүрээний мэдэгдэл, 2025-2026 оны төсвийн төсөөллийн тухай хуулийн төслийг танилцууллаа.
Ерөнхий эдийн засгийн чиг хандлага тотворжих, цаашид өсөх суурь бий болж байгаа хэдий ч олон улсад үүсч байгаа нөхцөл байдлыг харахад эдийн засгийн өсөлтөө нөөц сайтай төлөвлөхгүй бол дараагийн эрсдлүүд гарч болзошгүй байна. Тиймээс бид төсвийн хүрээний мэдэгдлийн тоонуудаа ЭЗХЯ-тай хамтарч хийлээ. Ирэх оны төсвийн хүрээний мэдэгдлийн гол тоонуудаас дурдвал,
- ДНБ-ний бодит өсөлт ирэх жил 6.5
- Инфляц буюу үнийн Монгол банкны тавьсан зорилтын хэмжээнд буюу 8 хувьд хүрч, энэ хязгаарт нь барина.
- Нэгдсэн төсвийн тэнцвэржүүлсэн орлого 21 их наяд 163 тэрбум буюу өмнөх жилийнхээс 11 хувийн өсөлттэй.
- Зарлагын дээд хэмжээ нь 2024 онд 22 их наяд 996.1 тэрбум буюу өмнөх оноос 12 хувийн өсөлттэй байхаар төлөвлөлөө.
- Алдагдал буюу нэгдсэн тэнцэл 2.8 хувь дээр барьж байгаа.
- Алдагдлын хэмжээ 1 их наяд 832.9 тэрбум төгрөг байх нь гэсэн төсвийн хүрээний мэдэгдлийг Засгийн газарт танилцууллаа. Ингээд хуулийн хугацаандаа буюу ирэх даваа гарагт УИХ-д өргөн барина" гэв.
Т.СОЁЛ