Засгийн газрын хуралдаанаас гаргасан шийдвэрүүдийг танилцуулж байна. Энэ үеэр Сангийн сайд Б.Жавхлан мэдээлэл өглөө.
Тэрбээр "Монгол Улсын Засгийн газар 2018-2021 болон 2022-2025 оны дунд хугацааны стратегийг УИХ-аар батлуулж, Засгийн газрын гадаад өрийн менежментийг хийгээд явж байна. Л.Оюун-Эрдэнийн Засгийн газрын үед бид маш хариуцлагатай, сахилга баттай ажилласны үр дүнд сайн үзүүлэлтүүд гарч эхэлж байна.
Өнгөрсөн онд 2023 оны төсвийг өргөн барих үед гадаадын өрийн нөхцөл байдал маш хүнд байсан. Гэсэн хэдий ч 2022 оны сүүл, 2023 оны нэгдүгээр улирлын байдлаар төлбөрийн тэнцлийг сайжруулах, гадаад худалдааны алдагдлыг багасгах, экспортыг нэмэгдүүлэх арга хэмжээг авсны үр дүнд Монгол Улс гадаад өртэй холбоотой дефолт болох эрсдэлээс бүрэн ангижирсан гэж хэлж болохоор боллоо.
Бид өнгөрсөн оны 12 дугаар сарын 5-нд 2010 онд босгосон Чингис бондын үлдэгдэл болох 136 сая долларыг төлж барагдуулсан бол удахгүй тавдугаар сарын 1-ний өдөр төлж барагдуулах ёстой "Гэрэгэ" бондын 368.7 сая долларыг бүрэн барагдуулах бэлтгэж ажлаа бүрэн хангаж дуусгасан байна. Үүнийг төлөх боломжийг энэ оны нэгдүгээр улиралд авч хэрэгжүүлсэн "Сенчири-2" төслийн хүрээнд уг өрийг төлөх валютын эх үүсвэртэй болж чадсан. Ингэснээр сүүлийн гурван жилийн хугацаанд буюу Л.Оюун-Эрдэнийн засгийн газрын үед нийт нэг тэрбум, 650 сая долларын өрийг барагдууллаа. Мөн 487 сая долларын богино хугацааны арилжааны бондын өрүүдийг бууруулж байна" хэмээлээ.
Т.СОЁЛ