"Хөгжлийн банк"-ны гэх 80 хүн, хуулийн дөрвөн этгээдэд холбогдох эрүүгийн хэргийн гэм буруугийн шүүх хуралдаан найм дахь өдрөө үргэлжилж байна. Өнөөдөр "Мах Импекс", "Монгол эм импекс" компанид олгосон зээлийн асуудлыг хэлэлцэж байна.
Хөгжлийн Банкны дэд захирал асан Б.Чойжилжалбуу:
"Миний удирдлага доор дөрвөн хэлтэс байсан. Гаднаас эх үүсвэр татан төвлөрүүлэх зорилготой эх үүсвэрийн хэлтэс. Нэгэнт ороод ирсэн мөнгийг зөв зохистой удирдах Нөөцийн удирдлагын хэлтэс, Стратеги төлөвлөлтийн хэлтэс, Хөрөнгө оруулалтын бодлого зохицуулалтын хэлтэс буюу зах зээлийн судалгааны хэлтэс гэсэн хэлтсүүд ажиллаж байсан.
Зах зээл дээр төслүүд хэрхэн бойжих, хэрхэн амьд байх тал дээр илүүтэй хардаг байсан. Миний ажиллаж байх хугацаанд 500 сая долларыг Засгийн газрын баталгаагүйгээр Хөгжлийн банканд татан төвлөрүүлсэн.
Ажлын бус цагаар үйлдэгддэг арга хэмжээнд миний бие арай дүү учраас бэлэг дурсгалын зүйлд явах, нийтийн арга хэмжээнд сөн түших зэрэг байдаг л зүйл болж байсан.
Мөн нөөцийн удирдлагын чиг хүрээнд 300 тэрбум буюу өнөөдрийн ханшаар 80-90 сая долларын ханшийн алдагдал үүссэн байсан. Үүнийг тэгшитгэх үйл ажиллагаа явуулж, алдагдлаас хамгаалж байлаа. Хөгжлийн банканд оруулсан миний хувь нэмэр их байгаа гэж бодож байна.
Аливаа байгууллагад соёл байдаг. Хамт олны уур амьсгал аятайхан байх, эвтэй байх үүднээс төрсөн өдөр, баяр ёслол хамтдаа тэмдэглэх зүйл Хөгжлийн банканд ч байсан. 2017 оны наймдугаар сарын 10-ны өдөр Хөгжлийн банкны ТУЗ-ийн дарга Б.Даажамбын 40 насны төрсөн өдөр болсон. Санхүүгийн зах зээлд ажиллаж буй хүмүүс хоёр хуваагддаг. Нэг хэсэг нь МУИС-ийг, нөгөө нь СЭЗИС-ийг төгссөн төгсөгчид. Хөгжлийн банкны удирдлагад МУИС-ийг төгссөн ТУЗ-ийн дарга Б.Даажамба, гүйцэтгэх захирал Б.Батбаяр, Зээлийн удирдлагын захирал Ч.Мөнхбаяр, Тэргүүн дэд захирал Ч.Энхбат болон миний бие ажиллаж таарсан. Би энэ хэдээс сүүлд төгссөн, хамгийн залуу нь.
Ажлын бус цагаар үйлдэгддэг арга хэмжээнд миний бие арай дүү учраас бэлэг дурсгалын зүйлд явах, нийтийн арга хэмжээнд сөн түших зэрэг байдаг л зүйл болж байсан. Б.Даажамбын төрсөн өдрөөр би цалингаа авдаг Төрийн банкны картаар нэг бал авч өгсөн. Бид мөнгөө нийлүүлээд. Энийг энэ төсөлтэй уядаг, холбодог, бас таамагладаг. Наймдугаар сарын 10-нд картаа уншуулаад балаа өгсөн.
Энэ төслийн Хөгжлийн банканд хандсан өдөр нь төрсөн өдрөөс хойш 50-60 хоногийн дараа болсон. Би банк санхүүгийн чиглэлээр 20 жил ажиллаж байна. Барилгын чиглэлийн бизнес эрхлээд 14-15 жил ажлынхаа хажуугаар явуулж байна. Энэ хоёр этгээд харилцан хоорондоо наймаа хийсэн явдал нь зах зээлийн байдаг л харилцаа. Хууль зөрчсөн гэж би бодохгүй байна. Зарж байгаа тал нь ч, авч байгаа нь ч аль аль нь өөрсдөдөө ашигтай байсан.
Тэд өөр өөрсдийн салбартаа танигдсан аж ахуй нэгжүүд. Зах зээл дээр хоёр компани одоо ч оршин тогтнож байна, цаашдаа оршин тогтноно. Бид зөв зүйтэй зээл олгосона. Тухайн үедээ зээлийн шалгуур хангасан гэж үзэж байгаа учир зээл олгосон гэж би ойлгож байна. Цаашдаа тодорхой баримттай ярина байх гэж бодож байна" гэлээ.