МАН-д дээшээ ахидаггүй ч даргын суудлаас буудаггүй “дундаж давхаргынхан” байдаг. Тэдний нэг бол Мягмаржавын Ганбаатар гэх эр. Түүнийг гавьсан боловсролгүй ч 2001 оноос хойш буюу 26 настайгаасаа даргын суудлаас ер буугаагүй гэхэд хилсдэхгүй. Намтраас нь л ингэж харагдаж байгаа юм. Тэрээр Монгол бизнес сургуулийг эдийн засагчаар 1996 онд төгссөн байна. БОАЖЯ-ны сайтад тавьсан намтартаа Батлан хамгаалахын их сургуульд 1996-1998 онд магистр хамгаалсан гэжээ. Гэхдээ 2017 онд “De Facto” нэвтрүүлэгт оролцохдоо Хүмүүнлэгийн ухааны сургуулийг англи хэлний багш, орчуулагчаар төгссөн гэж байсан ч яамны сайтдаа энэ боловсролоо бичээгүй харагдав. Магадгүй “De Facto” андуурсан байж болох.
М.Ганбаатар нь 2001 оноос “Монгол Шуудан” ХК-ийн хэлтсийн даргаас төрийн албанд даргын суудал засч эхэлсэн байна. Сайн нэртэй дарга байгаагүй ч дараагийн сандал суудлаа бол засч чадсан гэдэг.
Тухайлбал, УИХ-ын дарга, МАН-ын дарга асан М.Энхболдыг Нийслэлийн Засаг даргаар ажиллаж байх хугацаанд Нийслэлийн Өмчийн харилцааны газрын даргаар томилогдсон байгаа юм. Мөн НИТХ-ын төлөөлөгчөөр 2004-2008 онд сонгогдсон. 2008 оноос Нийслэлийн гэр хорооллын дэд бүтцийн газартай холбогдож, 2016 оноос энэ газрынхаа даргын албан тушаалыг хашсан ч БОАЖЯ-ны сайтад байршуулсан дэд сайдын намтартаа энэ албаа мөн л огт дурдаагүй байна.
2012-2016 онд Нийслэлийн намын хорооны дэд дарга байсан гэдгээ л онцолсныг бодоход “би намдаа байр суурьтай нэгэн шүү” гэж хэлэхийг хүссэн юм болов уу. Түүний даргаар өнөөх 60 тэрбумын хэмээн буруутгагдан улстөрөөс арчуулсан Ц.Сандуй байсныг сануулъя. Дарга нь, “арьсаа зумлуулж” байхад мань хүн нэгжийн даргын суудлын ард сэмхэн нуугдсан нь үнэн. Тэр бол М.Энхболд, Ц.Сандуй нарын гарын хүний нэг нь мөнөөс мөн. Хоёр даргаасаа “мурихдаа” 2008 онд “Эсэргүү төлөөлөгч” гэх ном гаргаж, олны анхаарлын төвд биш ч ордны анхаарлын төвд орж чадсан байдаг.
Э.Бат-Үүл хотын дарга байхдаа хамгийн их ярьсан, нийслэлийн АН-ын мөрийн хөтөлбөрийн цөм шахуу байсан “гэр хорооллын дахин төлөвлөлт” гэх том төслийг тэг зогсолтод оруулж чадсан хүн бол М.Ганбаатар. Тийм ч учраас мань хүнийг МАН 2018 онд багагүй мөнгөтэй “Шахмал түлш” гэх том төслийн толгойд залсан биз. Уг нь “Шахмал түлш” бол аль хэдийнэ эхэлчихсэн, ажил нь тодорхой болчихсон төсөл байсан. М.Ганбаатартай, Ганбаатаргүй явж л байсан ажил.
2020 оны сонгуулийн өмнө өөрийгөө нийслэлийн утааг бууруулсан баатар мэт ойлгож, МАН-ын “Алтан сарнай” атгасан. Гэлээ гээд түүнд УИХ-ын тойрог хуваарилаагүй. Түүнийг Ерөнхийлөгч У.Хүрэлсүхийн атганд байдаг цөөн дүүгийн нэг гэх нь бий. Тиймээс муу нэр зүүсэн ч даргын суудлаас буудаггүй гэх. Саяхан УИХ дээр Зайсанд утаа үнэртээд байгаа тухай мэдээлэл гарав уу, үгүй юу М.Ганбаатарыг сольсон. Хариуцлага тооцлоо гэтэл харин ч тушаал ахиулаадахсан.
Байгаль орчин аялал жуулчлалын дэд сайд гэх суудлыг М.Ганбаатарт хуваарилав. Яг үнэндээ дэд сайд бол шийдвэр гаргах гарын үсэг биш. Гэсэн ч энэ хүнгүй бол Байгаль орчны салбар явахгүй байгаа аятай утаанаас, мод руу шилжүүлсэн.
БОАЖ-ын сайд өчигдөрхөн Мод үржүүлэг, цэцэрлэгжүүлэлтийн салбарт үйл ажиллагаа явуулж байгаа аж ахуйн нэгжийн төлөөлөлтэй уулзахдаа “Мод үржүүлэг, цэцэрлэгжүүлэлтийн мэргэжлийн зөвлөл байгуулж, ахлагчаар нь М.Ганбаатарын тавьсан гэв. Сайд тулгамдаж буй асуудалд тодорхой үр дүн гаргаж, шуурхай ажилллахын тулд мэргэжлийн зөвлөл байгуулсан хэмээн тайлбарлажээ.
Харамсалтай нь, М.Ганбаатарын өмнө нь хийсэн ажлуудаас дүгнэвэл тулгамдаж буй асуудлыг шийдэх нь байтугай зангилж овоолоод эцэст нь тэг зогсолтод хүргэхээр харагдаж байгаа юм. Ерөнхийлөгч У.Хүрэлсүх өнөөдөр Польшийн Ерөнхийлөгчийн Монголд урьж ярилцахдаа “Тэрбум мод” хөтөлбөрөө онцолж, бас ч үгүй боловсон гуйлга гуйсан. Харин доор нь өч төчнөөн М.Ганбаатар мэтийн дарга ажилласаар байна.