Швед улс Оросын таван дипломатчийг эх орноосоо хөөх шийдвэр гаргаcан талаар Ройтерс болон Ассошиэйтед Пресс агентлаг орон нутгийн цагаар 25-ны өдөр мэдээллээ.
Шведийн Гадаад хэргийн яамны зүгээс мэдэгдэл хийхдээ, Швед дэх ОХУ-ын Элчин сайдын яамны таван ажилтныг дипломат харилцааны тухай Венийн конвенцийг зөрчсөн үйл ажиллагаа явуулсны улмаас нутаг буцах шаардлага хүргүүлсэн ба энэ талаар ОХУ-ын Элчин сайдын яаманд мэдэгдсэн хэмээн дурдсан байна.
Гэвч эдгээр таван дипломатч яг ямар хууль бус үйл ажиллагаа явуулсан талаар дурдаагүй юм.
Өнгөрсөн жил Украинд дайн эхэлснээс хойш Швед төдийгүй Европын орнууд ОХУ хууль бус тагнуулын мэдээлэл цуглуулах үйл ажиллагаа явуулж буйд санаа зовж буйгаа илэрхийлж байсан билээ.
Өнгөрсөн долоо хоногт Шведийн хэвлэл мэдээллийн SVT агентлаг ОХУ-ын тагнуулын үйл ажиллагааны талаар мэдээлсний дараахан энэхүү шийдвэрийг гаргасан нь ихээхэн анхаарал татаж буй юм.
Тодруулбал ОХУ нь Нордикийн эрчим хүчний дэд бүтцийн эсрэг хорлон сүйтгэх үйл ажиллагааны нэг хэсэг болгон Шведийн нутаг дэвсгэрт тагнуул хийх зорилгоор байлдааны хөлөг онгоц болон иргэний хөлөг онгоцуудыг ашиглаж байна хэмээн STV агентлаг мэдээлж байсан юм.
Эх сурвалж: SBS