Суданд тулалдаж буй хоёр генерал мягмар гарагт АНУ, Саудын Арабын зуучлалаар гурван өдрийн эвлэрэл байгуулахаа амлав. Энэ нам гүм байдлыг ашиглан гадаадын улс орнууд иргэдээ тус улсаас бөөнөөр нь нүүлгэн шилжүүлэх ажлыг эхлүүлэв.
Хэдэн зуун дипломатч, хүмүүнлэгийн ажилчид болон гадаадын бусад иргэдийг Суданаас агаар болон газраар нүүлгэн шилжүүлэхээр бэлдэж байна.
Мягмар гарагийн шөнө дундаас эвлэрийн цаг хугацаа тоологдож эхэлсэн. Энхийн гэрээ хэр удаан үргэлжлэх нь тодорхойгүй байна. Энэ нь тулаан эхэлсэн сүүлийн есөн өдрийн хугацаан дахь гал зогсоох тухай дөрөв дэх удаагийн мэдэгдэл юм.
АНУ-ын Төрийн нарийн бичгийн дарга Энтони Блинкен 48 цагийн хэлэлцээний үр дүнд Шуурхай дэмжих хүчин болон байнгын армитай гал зогсоох тохиролцоонд хүрсэн гэж мэдэгдэв.
"Шуурхай дэмжих хүчин"-ийн мэдээлснээр, эвлэрэл эхэлсний дараа тус улсын байнгын зэвсэгт хүчний нисэх онгоц Хартумын дээгүүр нислэгээ үргэлжлүүлж, гэрээний нөхцлийг зөрчиж байна гэж мэдэгдэв.
Блинкений зарласан гал зогсоосноос хойш хоёр цагийн дараа Суданы арми ч үүнийг дагаж мөрдөх бодолтой байгаагаа фэйсбүүк хуудсаараа дамжуулан мэдэгджээ.
Суданд дөрөвдүгээр сарын 15-нд тулалдаан болж, 400 гаруй хүн амь үрэгдээд байна. Мөргөлдөөний улмаас нийслэл Хартум хотын оршин суугчид хоол хүнс, усны хомсдолд орж, гэртээ үлдэхээс өөр аргагүйд хүрчээ. Зарим газар усны хангамж эвдэрч, Хартумын олон оршин суугчид Нил мөрнөөс ус зөөхөд хүрчээ.
Мягмар гарагт Их Британи иргэдээ Суданаас бөөнөөр нь нүүлгэн шилжүүлэхээ зарлав. Их Британийн Хатан хааны агаарын цэргийн хүчний онгоцууд хүмүүсийг Хартумын ойролцоох нисэх онгоцны буудлаас гаргах болно гэж таамаглаж байна.
Хартум хотод Ням гарагийн оройноос хойш интернет бүрэн тасарсан байна.
Суданы байнгын арми болон хагас цэрэгжсэн Шуурхай дэмжлэг үзүүлэх хүчний хооронд 4-р сарын 15-нд SBP-ийн командлагч генерал Мохамед Хамдан Дагало дайчдаа улс даяар тараасны дараа армийнхан аюул заналхийлсэн гэж үзээд эхэлсэн.
Суданы мэргэжилтнүүдийн тайлбарласнаар мөргөлдөөн нь төрийн тэргүүн, генерал Абдель Фаттах аль-Бурхан болон түүний орлогч генерал Мохамед Хамдан Дагало нарын хувийн сөргөлдөөнтэй холбоотой юм.
Эх сурвалж: ВВС