Усны тухай хуульд нэмэлт оруулах тухай хуулийн төслийн талаарх хэлэлцүүлэг өчигдөр Төрийн ордонд боллоо.
Усны тухай хуульд нэмэлт оруулах тухай хуулийн төслийн ахлагч УИХ-ын гишүүн Г.Мөнхцэцэг: Усны тухай хуулийн ажлын хэсгийг ахалж, усны хуульд нэмэлт өөрчлөлт оруулахаар ажиллаж байна. Энэ утгаар усны талаар судалгаа шинжилгээ хийдэг эрдэмтэн мэргэд, усны салбарын эрдэмтэн докторууд, их дээд сургуулиудын доктор профессоруудыг урин хэлэлцүүлэг зохион байгууллаа. Энэ хүрээнд манай эрдэмтэн мэргэдээс их олон шинэ санаачлага, санал гаргаж байна.
Жишээлбэл: Усыг эрэмбэлж байгаа тал дээр санал зөрөллдөж, шүүмжлэлтэй хандаж байна. Дээр нь Усны бодлого дээр онцгойлон анхаарч, Усны агентлагтай болгох ч юм уу, төрийн бодлого хэрэгжүүлэх, анхааралдаа авах шаардлагатай болсон талаар маш үнэтэй саналуудыг эрдэмтэд маань гаргаж байна. Мөн Усны хэрэглээ, төлбөр, нөөцийн асуудлыг ярилцах, усны судалгаа дата баазуудыг байгуулах, шинэчлэх хэрэгтэй болсон гэдгийг салбарынхан маань хэлж байна. Өнөөдрийн хэлэлцүүлгийн үр дүнд "Бидэнд тулгараад байгаа усны асуудал дээр ямар гарц гаргалгаа байгаа вэ гэдэг дээр илүү их үнэтэй саналуудаа хэллээ" хэмээв.
Монгол Улс усны бодлогын асуудлаар хууль эрх зүйн хүрээнд тодорхой, хариуцлагын арга хэмжээнд хяналтыг сайжруулах зайлшгүй шаардлагатай байна. 2012 онд уг хуулийн шинэчилсэн найруулгыг баталсан хэдий ч зарим зохицуулалтыг орхигдуулсан учир хуулийн төслийг хэлэлцүүлэгт бэлтгэх үүрэг бүхий Ажлын хэсгийг байгуулсныг онцлон тэмдэглэв.
Тухайлбал, Усны тухай хуульд газрын дор байгаа усны зохицуулалтыг хийх эрх зүйн орчин бүрдээгүй байна. Монгол Улс нийт усны хэрэглээний 80 хувийг, цэнгэг усныхаа нөөцийнхөө 1.9 хувийг газар доорх усыг ханган ашигладаг. Байдал энэ янзаар үргэлжилбэл экологийн тэнцвэргүй байдалд орох, усны хомсдол үүсэх тооцоо, судалгаа байгаа нь анхаарал татсан асуудал гэдгийг дурдав.
