Хятадын Zhejiang мужийн Жоушань хотод 5-р сарын 7-ны оройн 20 цагийн орчимд тэнгэр час улаан өнгөтэй болсон хачирхалтай үзэгдэл болжээ.
Интернэтэд тавигдсан бичлэгээс хятадын иргэд их айдас түгшүүртэй байгааг харж болохоор байгаа юм. Боомтын ойролцоох “Улаан тэнгэр" нь Хятадын “Twitter”-тэй адил нийгмийн сүлжээ болох “Sina Weibo”-ийн трэнд сэдэв болж, 150 сая гаруй хүн тус бичлэгийг үзсэн байна.
Хятадын ард иргэд улаан тэнгэрийг Ковид-19 нэмэгдэж байгаатай холбон, муу ёрын дохио гэж сэжиглэж байна. Зарим иргэд айж түгшин хоол хүнсээ бэлдсэн гэнэ.
Энэхүү цаг агаарын хачирхалтай үзэгдлийг гэрлийн хугарлын үр дүн гэж Жоушань хотын цаг уурын товчооны ажилтнууд тайлбаржээ.
"Цаг агаарын нөхцөл байдал сайн байгаа үед агаар мандалд илүү их ус агуулагдах аэрозолийг үүсгэж, загас агнуурын завины гэрлийг хугалж, сарниулж, олон нийтэд харагдах улаан тэнгэрийг бий болгодог" гэж Жоушань цаг уурын товчооноос мэдээлсэн аж.