АНУ-ын Ерөнхийлөгч Жо Байден Украйнд Киевт цэргийн тусламж үзүүлэх ажлыг хялбарчлах үүднээс “Ленд-лийз”-ийн гэрээгээр зэвсэг нийлүүлэх тухай хуульд гарын үсэг зурлаа.
Энэ оны нэгдүгээр сард Конгресст өргөн барьсан хуулийн төслийг тавдугаар сарын 3-нд АНУ-ын Конгрессын Төлөөлөгчдийн танхим олонхын саналаар баталсан юм.
Уг хуулийн төсөлд АНУ-ын Ерөнхийлөгч Ж.Байден "Зүүн Европын орнуудын батлан хамгаалах чадавхыг бэхжүүлэх, энгийн иргэдийг ОХУ-ын болзошгүй халдлага эсвэл тус улсын зүгээс үргэлжилж буй түрэмгийллээс хамгаалахад туслах зорилгоор Украинд болон ОХУ-ын Украйн руу хийсэн довтолгооны улмаас хохирсон Зүүн Европын бусад оронд батлан хамгаалахын тоног төхөөрөмжийг зээлээр олгох, түрээслэхийг Засгийн газарт зөвшөөрч болно". хэмээн заажээ.
Энэхүү хуулийн төсөл нь Дэлхийн II дайны үед АНУ холбоотнууддаа зэр зэвсэг, цэргийн тоног төхөөрөмж, хоол хүнсийг урт хугацаагаар хойшлуулсан, урьдчилгаа төлбөргүйгээр нийлүүлж байсан ленд-лийзийн тухай хуультай адил хэрэгжих юм. Дэлхийн II дайны үед ийм тусламжийг гол хүлээн авагчдын нэг нь Зөвлөлт Холбоот Улс байв. Харин энэ удаа ОХУ-ын эсрэг хэрэгжихээр боллоо.
