Нийгмийн Бодлогын Байнгын хороо өнөөдөр /2022.05.10/ хуралдаж, ЭМД-ын үндэсний зөвлөлийн өнгөрөгч 2021 оны тайланг танилцуулж байна. Энэ үеэр УИХ-ын гишүүн Ц.Туваан өрхийн эрүүл мэндийн төв буюу анхан шатны эмнэлгийн байгууллагуудад нэг иргэнд тооцдог санхүүжилтийг хоёр дахин өсгөх ажлын явц яагаад хэрэгжихгүй байгаа талаар сангийн яамнаас асуулаа.
Тэрбээр, "Энэ танилцуулгад ахиц дэвшил нэртэй маш олон тоо оруулж ирсэн байна. Ахисан, дэвшсэн, сайжирсан, шийдвэрлэсэн гэх танилцуулга тавьлаа. Болохгүй, бүтэхгүй байгаа зүйлээ огт ярихгүй байна. Тухайлбал, хөдөө орон нутаг болон сумдын эрүүл мэндийн асуудал хүнд байгаа. Эрүүл мэндийн сайд, ЭМД-ын газрыхан, Сангийн яам ажлаа хий. Бид төсөв, бүтэц баталж өгөөд байхад ажил урагшлахгүй байна. ЭМД-ын Үндэсний зөвлөлийн 03, 04 тогтоолыг өөрчилнө гэж байсан, өөрчлөөд 05 болсон байна. Гэвч шийдвэрт хүрсэн юм уу. Тэгвэл наад захын жишээ эрүүл эх төрөхөд өгөх мөнгө хэд болсон юм. Эмч нараас асуухаар 280,000 төгрөг гэх юм. Бид байнгын хороон дээр 550 мянга болгоно гэж ярьж байсан. Энэ яг шийдэгдсэн юм уу. Хэзээнээс эхлэн эрүүл мэндийн санхүүжилт хоёр дахин нэмэгдэх вэ? энд Сангийн яам хариулт өг. Яагаад шийдэгдэхгүй байна, яагаад удаашруулаад байна" гэв.
