АНУ-ын цэргийн маш нууцын зэрэглэлтэй баримт бичгүүдийг нийгмийн сүлжээнд задруулсан гэх үндэслэлээр Украин цэргийн зарим төлөвлөгөөгөө өөрчилсөн тухай CNN Владимир Зеленскийн ойрын эх сурвалжаас иш татан мэдээллээ.
Ингэж нууц мэдээлэл задарсан нь Пентагоныг өдөр бүр засгийн газрын олон зуун хүмүүст хүртээмжтэй байдаг нууц баримт бичгийн урсгалыг бууруулах арга хэмжээ авахад хүргэсэн гэж тэмдэглэжээ.
Батлан хамгаалах яамны дээд албан тушаалтнуудыг багтаасан, АНУ-ын ерөнхийлөгчид зөвлөгөө өгдөг Штабын дарга нарын нэгдсэн хороо нууцын зэрэглэлтэй мэдээллүүдийг хэн авч байгааг олж тогтоохын тулд явуулсан бичиг захидлын жагсаалтаа шалгаж байна гэж Пентагоны хэвлэлийн төлөөлөгч мэдэгдэв.
Интернэтээр олон нийтэд тараасан нууц баримт бичгийн ихэнх нь тагнуулын алба буюу J2 гэж нэрлэдэг хорооны бэлтгэсэн товч танилцуулгын баримт бичиг байсан бололтой.
Өчигдөр Пентагон баримт бичгийн жинхэнэ бодит эсэхийг үргэлжлүүлэн шалгаж, үүний улмаас үндэсний аюулгүй байдалд учирсан хохирлыг тооцохоор ажиллаж байна гэж мэдэгдэв. АНУ-ын холбоотнууд ч мөн задруулсан мэдээллийн улмаас өөрсдөд нь учирч болох эрсдлийг үнэлж, тодорхойлохыг оролдож байна.
"АНУ ойрын өдрүүдэд хохирлын үнэлгээгээ бидэнтэй хуваалцана гэж найдаж байна. Бид тэдний үнэлгээг хүлээж байна. Яг одоо бид өөрсдийнхөө үнэлгээг хийж байна" гэж АНУ, Австрали, Канад, Шинэ Зеланд, Их Британийн хамтарсан холбооны нэг ажилтан хэлжээ.
Эх сурвалж: ВВС