Баянгол дүүргийн Засаг даргаас огцроод буй Ө.Сумъяабаатар, тус дүүргийн ЗДТГ-ын газрын дарга Б.Нарангэрэл нар татвар төлөгчдийн мөнгийг үр ашиггүй зарцуулсан нь аудитын шалгалтаар тогтоожээ.
Тодруулбал, Баянгол дүүргийн ЗДТГ-ын 2022 оны санхүүгийн тайланд шалгалт хийхэд 222 сая төгрөгийн зөрчил илэрчээ. Тус дүүргийн удирдлагууд Төсвийн тухай хууль, Төрийн хэмнэлтийн тухай хуулийг тус тус зөрчиж 155 сая 336 мянган төгрөгийг гадаад албан томилолтод зарцуулж, албан хаагчдыг төсвийн мөнгөөр аялуулсан байна. Энэ үйлдэл нь Монгол Улсын Төсвийн тухай хуулийн 16 дугаар зүйлийн 16.5.5 "батлагдсан төсвийг зориулалтын дагуу зарцуулах" заалт болон бусад заалтуудыг зөрчсөн байгаа юм.
Үүнээс гадна тус дүүргийн ЗДТГ-ын газрын дарга Б.Нарангэрэл А/346 тоот тушаал гаргаж нэр бүхий ажилтны хувийн дансанд 4 сая төгрөг төгрөг шилжүүлж зөрчил гаргажээ. Мөн Шүүхийн шийдвэрээр халагдсан 2 ажилтны ажилгүй байсан хугацааны цалин болох 38 сая төгрөгийг төсвөөс олгож, ажлаас чөлөөлсөн албан тушаалтнаар нөхөн төлүүлээгүй байна.
Дүүргийн ИТХ-ын төлөөлөгчдийн олонхын саналаар огцроод буй Ө.Сумьяабаатар нь 2022 оны 02-р сард нэр бүхий хүмүүсийг АНЭУ руу томилолтоор явуулах тушаал гаргаж 25.9 сая төгрөгийг хууль зөрчин зарцуулсан гэж шүүмжлүүлж байсан. Тухайн үед Ө.Сумъяабаатарын тушаалаар гадаадад албан томилолт нэрээр аялсан хүмүүс нь УИХ-ын гишүүн Ж.Ганбаатарын ойрын хүмүүс байсан гэж цөөнгүй хэвлэл мэдээлсэн байдаг. Тэгвэл Баянгол дүүргийн удирдлагуудын хууль зөрчиж гадаад томилолтод зарцуулсан зардлын хэмжээ 2022 оны эцэст 6 дахин өсөж 155 сая 366 мянган төгрөг болсон нь аудитын шалгалтаар ийнхүү ил боллоо.
