Тусгай хамгаалалттай газар эзэмшигчдийн мэдээллийг авлигатай тэмцэх шилэн ажиллагааны хүрээнд ил болгосон. Тодруулбал, төрийн томчуудаас урлаг соёлынхон, бизнесмэнүүд тусгай хамгаалалттай буюу дархан цаазат газарт газар эзэмшиж байгаа. Тэд ямар замаар яаж газрын зөвшөөрөл авсан бэ гэдэг нь нэлээд анхаарал татаж байгаа. Тэгвэл нэр бүхий эрхмүүдийн дунд ЭХЭМҮТ-ийн захирал байсан өдгөө эмнэлгийнхээ ерөнхий эмчээр ажиллаж байгаа Ш.Энхтөрийн нэр харагдав. Түүнийг Нүхтийн аманд 2017 онд 0.101 га газар авсан гэж зураг мэдээллийг нь гаргажээ. Харин энэ мэдээллийг эмч Ш.Энхтөр үгүйсгэсэн байгаа юм. Тэрбээр "Лайв тв сайтын сэтгүүлч буруу мэдээлэл гаргасан байна билээ. Залруулга хийж, уучлал гуйхыг шаардаж байна. Мань мэтийн эмчид Нүхтийн аманд өчүүхэн ч газар байхгүй шүү. Баахан боссуудын дунд аваачаад зураг хөрөгтэй нь залчихсан байсан. Мэдээллээ шалгадаг байх хэрэгтэй" гэжээ.Тэгэхээр овог нэр ижилхэн хүнийг ЭХЭМҮТ-ийн эмч Ш.Энхтөр гээд ойлгочихсон бололтой. Ямартаа ч өөрөө дээрх мэдээллийг үгүйсгэж, ташаа мэдээлэл гаргасан сайтын сэтгүүлчийг уучлал гуйж мэдээллээ залруулахыг хүсчээ.