2022 онд хамгийн их зорчигч үйлчлүүлсэн ачаалал ихтэй олон улсын нисэх онгоцны буудлуудын ихэнх нь АНУ-ын нисэх буудлууд байжээ. Тодруулбал эхний 10 буудлын 5 нь, эхний 5-ын 4 нь АНУ-ынх байв.
Wall Street Journal сонин 5-ны өдөр Нисэх онгоцны буудлын олон улсын комисс (ACI)-оос иш татан мэдээлснээр, өнгөрсөн жил Жоржиа мужийн Атланта хотын Хартсфилд-Жексон олон улсын нисэх онгоцны буудлаар 93.7 сая зорчигч үйлчлүүлсэн болохыг онцолжээ. Энэ нь цар тахлын нөлөө илүү хүчтэй байсан өмнөх жилтэй харьцуулахад 24 хувиар өссөн хэрэг боловч цар тахал дэгдэхээс өмнө буюу 2019 онтой харьцуулахад 15 хувиар бага байгаа юм.
Хоёрдугаарт Техас мужийн Даллас-Форт Уорт хотын нисэх онгоцны буудал 73,4 сая зорчигчтойгоор, Колорадо мужийн Денвер хотын олон улсын нисэх буудал 69,3 сая зорчигчтойгоор удаах байрт оржээ. Чикагогийн О'Харе нисэх онгоцны буудал (68,3 сая) дөрөвдүгээрт, Лос Анжелесийн олон улсын нисэх онгоцны буудал (65,9 сая) зургаад жагссан байна.
АНУ-аас гадна хамгийн ачаалалтай нисэх онгоцны буудлаар Арабын Нэгдсэн Эмират улсын Дубайн нисэх буудал нэрлэгдсэн бөгөөд 66.1 сая зорчигчтойгоор тавдугаарт жагсав. Түүний араас Истанбул (64.3 сая) 7-д, Лондон (61.6 сая) 8-р байранд орсон бол 9-р байранд Шинэ Дели (59.5 сая), 10-т Парисын олон улсын нисэх онгоцны буудал (57.5 сая) тус тус оржээ..
2022 онд дэлхийн хэмжээнд агаарын тээврээр зорчигчдын тоо 54 хувиар нэмэгдэж, 7 тэрбумд хүрсэн нь дэлхийн нийт хүн амын 90 хувийг эзэлж байгаа хэрэг хэдий ч 2019 оны үзүүлэлтээс 26 хувиар доогуур хэвээр байгаа юм.
АНУ-ын нисэх онгоцны буудлуудад өнгөрсөн нэг жилийн хугацаанд 181.000 нислэг цуцлагдсан тохиолдол бүртгэгдсэн байна. Түүнчлэн эдгээр нисэх онгоцны буудлуудад 60 мянга гаруй зорчигчийн гомдол иржээ.
Эх сурвалж: Newsis
