CNN агентлагийн мэдээлснээр, ДЭМБ даваа гарагт олон нийтэд хүргэсэн тайландаа үргүйдэл нь маш түгээмэл болсныг дурдаад дэлхийн нийт хүн амын 17.5 хувь нь энэхүү шинж тэмдгийг ямар нэгэн байдлаар мэдэрсэн гэжээ.
Үргүйдлийн түвшин 17.5 хувь байгаа нь дэлхийн бүхий л улс орон, бүс нутагт ойролцоо гарсан хувь хэмжээ гэдгийг тэмдэглэсэн байна.
ДЭМБ-ын нөхөн үржихүйн мэргэжилтэн, доктор Житау Мбуру “Шинжилгээний үр дүнд дэлхийн хүн амын 17,5 хувь нь хүүхэдтэй болох боломжгүй гэх тооцоо гарсан. Энэ нь дэлхийн 6 хүн тутмын 1 нь амьдралынхаа туршид үргүйдэлтэй тулгарч байна гэсэн үг юм” хэмээн өгүүлэв.
Түүнчлэн үргүйдлийн түвшин орлогоосоо шалтгаалдаггүй болохыг доктор Мбуру онцолсон юм.
Тодруулбал, баян чинээлэг болон ядуу буурай орнуудын үргүйдлийн түвшинд мэдэгдэхүйц ялгаа ажиглагдаагүй аж. Орлогын хэмжээ өндөр баян чинээлэг орнуудад 17.8 хувь байгаа бол дунд болон бага орлоготой орнуудад 16.5 хувь байна гэж тэрээр хэлээд энэ нь мэдэгдэхүйц ялгаа биш гэж нэмж дурдав.
Хэдийгээр үргүйдлийн хувь хэмжээ төдийлөн ялгаа багатай байгаа ч үүнийг шийдвэрлэх эмчилгээний зардал маш их зөрүүтэй байгаа юм. Мбуру хэлэхдээ, ядуу буурай орнуудын хүмүүс баян чинээлэг орнуудын иргэдтэй харьцуулахад үр шилжүүлэн суулгах зардалд орлогоосоо хамаагүй их хувь хэмжээг зарцуулдаг болохыг цохон тэмдэглэсэн байна.
“10 жилийн хугацаанд анх удаа” нэртэй ДЭМБ-ын зүгээс гаргасан үргүйдлийн талаарх энэхүү тайланг 1990-2021 он хүртэлх үргүйдлийн мэдээлэлд үндэслэн гаргасан бөгөөд үүнээс өмнө энэ сэдэвтэй холбоотой 133 судалгааны ажил бүртгэгджээ.
Эх сурвалж: Fnnews